DÊRSIM - 22yîne Festîvala Kultur û Xozaye ya Munzurî bi çalakîyê tewir bi tewir ame destpêkerdiş. Parlamentera DEM Partîye Ayten Kordu vat ke do semedê xoza, kultur û ziwanê xo vengê xo tewr berz bikerê.

 

Startê 22yîn Festîvala Kultur û Xozaye ya Munzurî ame dayîş. Festîvale, bi sloganê “Ma destûr nêdanê xespkerdişê xoza û îradeyê ma” yeno organîzekerdiş. Vernîya festîvale xeylêk welatî bi dahol û zurna Sûka Binerdî de ameyî têhet. Hemşaredarê Dêrsimî Bîrsen Orhan û Cevdet Konak, Parlamentera Partiya Têduştî û Demokrasî (DEM Partî) ya Dêrsimî Ayten Kordu, Hemserekê Pêroyî yê Komeleyê Elewiyan ê Demokratîk (DAD) Zeynel Kete û xeylêk kesî tewr bî. Beşdaroxan çerax tavistî. Dima ra zî eşkerayîye ameye dayîş. 

 

Eşkerayîye de pankartê “Ma do destûr nêdê xespkerdişê îrade û xozaya xo” ame wedaritiş. Hemşaredar Cevdet Konakî tarîxê 24-25ê temmuze 1923ine sey “Tarîxê çinhesibnayîşê nasname, kultur, tarîx, kurdbîyayîş û elewîbîyayîş” erjna. Cevdetî wina vat: “Vatî ke ‘ma do kurdan û elewiyan na herre ser çin bihesibnê. Parlamenterê Dêrsimî Meclis-î Mebûsan de vatî; ‘Ka şima vatêne no welatê ma pêrûne yo. Şima vatêne welatê ermenistanîjan û kurdistanijan o?’ O wext qeyûm ziwan, kultur û tarîxê ma rê yeno tayînkerdiş. Ma semedê Dêrsimê xo têkoşîn kenê. Pîrik û kalê ma yê têkoşer 1938ine de ameyî qirkerdiş. Amancê esasî yê na festîvale, hemverê ferasetê ma û nasnameyî çin yeno hesibnayîşî yo.” 

 

'Ma do her tim nê kuçeyan de bê’ 

 

Parlamentera DEM Partîye ya Dêrsimî Ayten Kordu zî wina vat: “Şarê ma serê na herre de her tewir înkar, çinkerdiş, talan û asîmîlasyon ciwîya. Ma hema zî ciwîyenê. Qerarê Meclisî reyde do vengê cinîyan, xoza û bawerîyan tewr kilm bikerê. Polîtîkayê înkar û asîmîlasyonî yê vernîya komare ra dest pêkerdibî hema dewam kenê. Nê festîvalan ra amancê ma oyo ke ma hemverê înkar, çinkerdiş û asîmîlasyonî bêrê têhet û bawerî, kultur û huqûqê Dêrsimî qal bikerê û kulturê xo mende bikerê. Seke kurdê elewî ma do semedê bawerî, kultur û xozaya xo vengê xo berzêr bikerê. Ma do her kuçeyan de bê.” 

 

Dimayê eşkerayîye, Koroya Tutan a Behzat Fîrîk Kuçeyê Hunerî de çalakî organîze kerd.