![](/staticfiles/news/232077/2024/04/18/823x463cc-amd-18-04-24-cand-madan-rop-mansett.jpg)
Çand MA tutan bê muzîk nêverdeno
- 10:47 18 Nîsane 2024
- NAROJANE
Pelşîn Çetînkaya
AMED - Çand MA ke aşma verêne de Sûr de abî, hetêk de qursa ziwanê dayîke dano tutan û heto bîn de zî bi kampanyayê ke rayîr ra benê amanc kenê ke lazimîya kitab û enstrumanê tutan temîn bikerê.
Qezaya Sûrî ya Amedî de 17ê Adare de Çand MA seba tutan ame akerdiş. Roja ke ame akerdiş ra heta ewro xebatê xo dewam keno. Eleqeyê tutan û keyeyan seba qursî xeylê pîl o. Rayîrberîyê MA Muzîkî ra Evîn Tiryakîye vat ke do bi perwerde û qursî sînor nêmanê û derheqê Çand MAyî de qisey kerd.![](/staticfiles/1_amd-18-04-24-cand-madan-rop2.JPG)
‘Ê nêşikayê bêrê, ma ameyê’
Evîne dîyar kerd ke Çand MA bi amancê polîtîkayê asîmîlasyonî veng bivejno ame awankerdiş û wina vat: “Çi heyfo ke Sûr de serê tutan de polîtîkayê lêşinî yenê rayîr ra berdiş. Ma waşt ke ma destê xo bidê tutan. Dîclekent de di şûbeyê ma est ê. La tutê Sûrî nêeşkenê bêrê tîya. Coka ra ma ameyî tîya. Ma do tutan bê mûzîk nêverdê.”
Qursê Çand MAyî
Evîne qiseykerdişê xo wina dewam kerd: “Ma Çand MA 17ê Adare de akerd. Tutî û keyeyî eleqeyêke pîl mojnenê. Ma atolyeyê drama, kay, govend û resîmî akerd. Ma do dima ra yew bi yew dersê taybet bidê tutan. Tutî eleqeyêke zaf pîl mojnenê. Tutî serê sibaye yenê û heta şewe manenê.”
‘Tutî xeylê tesîr benê’
Evîne bale nat serê polîtîkayê ke yenê rayîr ra berdiş û wina peynî kerd: “Tutî polîtîkayê ke yenê rayîr ra berdiş ra xeylê tesîr benê. Demêk Sûr de şer estbî. Hem keye û hem zî tutî xeylê bi tesîr bîyê. Ma hedef kenê ke tesîrê psîkolojîk ê serê tutan wedarnê. Ma venga paştîdayîşî heme kesî rê kenê. Çand MAyî de kitabxaneyê Ehmed Huseynî ke 8 hezar kapasîteyê ci do bibo, ameyo awankerdiş. Ma hemwelatijan ra bexşkerdişê kitaban wazenê. Ma paştîdayîş wazenê.”