![](/staticfiles/news/238097/2024/07/24/823x463cc-amd-24-07-24-multecilere-farkli-bir-bakis-rezan-izlenim-remziye-ungen-manset.jpg)
‘Wa ê herra ma ra vejîyê’
- 10:35 24 Temmuze 2024
- NAROJANE
Gulîstan Gulmuş
AMED - Yew cinîyanê Kobanî yê ke Amed de ciwîyenê Aynûr a. Aynûre cewabê kesê ke înan ra vanê şêrê, dana: “Kesê ke vanê herra ma biterikinê, ganî vernê de ê herra ma ra vejîyê. Ê herra ma nêteriknê û şer dewam bikerê, gelo ma do senî abigêrê?"
Semedê şerê 13 serrî verê Bakur û Rojhelatê Sûrîye vejîya bi mîlyonan kesî herra ra xo mecbûr vejîyayî. Multecîyê Kurdistan û Tirkîya de ca bîyî her tim hêrişê nîjadperest reyde ameyî rî bi rî. Multecî semedê nê hêrişan bi endîşe yê.
Cinîya bi nameyê Fatma ke Kobanê ra koçber bîya wina vat: “Ma Kobanê de ciwîyayîne. Dewa ma est bî, keyeyê ma est bî. Dimayê şerî ma vejîyayî û ameyî tîya. Ma keyeyêk kîra kerd. Şarî hetkarî da ma. Ma bi îmkananê xo ca bîyî. Şarê tîya hetkarî da ma. Ma xerîb nêvînayî. Ma cîya nêvînayî. Ez wazena agêrî herra xo ser. Kam nêwazeno şêro herra xo ser. Ma ramitiş kerdêne. Ma genim çînayîne. Zeytunê ma est bî. Bajarê ma wina zaf weş bî.”
Fatma ke 3 tutê aye Kobanê de mendê da zanayîş ke destpêkê şerî ra heta nika 5 serrî verê şîya tutê xo dîyê.
Cîrane înan Remzîye ke wexto Fatma qiseykerdêne ameye û vat: “Çira wina nêzdîyê înan benê. Dayîka Fatma sey dayîka min a. Multecî yenê lînçkerdiş. Fatma şerî ra koçber bîya. Ameyî taxa ma. Wexto ke a û keyeyê xo ameyî rewşa înan xirab bî. Ma seferber bî. Ma hetkarî da înan. Ma kêmîyê înan temam kerd.
Fatma çîyê ke şer de amebî ciwîyayîş mi rê qal kerd. Vatêne serê sibayî bi vengê çeke û bombayan şîyar bîne. Dimayê nê tutanê xo girewtê û koçber bîyê.”
‘Wa herra ma ra vejîyê, ma agêrê’
Cinîya bi nameyê Aynure zî ameye verê ma û qalê hîkayeya xo kerd û wina vat: “10 serrî yo ez tîya ya. Ma semedê şerî ameyî tîya. Wexto ke ma ameyî şar zaf weş nêzdîyê ma bî. Vernê de zehmetî bî la hetkarî dayî ma. Ma ra vanê herra ma ra vejîyê. Cayê ke şer bibo, merdim eşkeno vindero? Kobanê de şer çinbo ma do agêrê. Çira ma nêwazenê. Bajaranê ma şima rijna. Şima uca de şer kenê. Ma do senîn tîya ra şêrê. Wa kes nêmiro û her kes agêro herra xo ser.”