![](/staticfiles/news/237996/2024/07/22/823x463cc-siirt-22-7-24-kurtalan-bld-es-baskani-sadiye-aktin-rop-manset.jpg)
Şaredarîya Misircî de do sîstemê fermuarî pê bîyarê
- 13:41 22 Temmuze 2024
- NAROJANE
Şehrîban Aslan
SÊRT - Hemşaredara Misircî Sadiye Aktîn da zanayîş ke pêwa pêro bêîmkanî şarî rê hewl danê xizmet bikerê û vat, prosesê îstîhdamî yê şaredarî de do 25 karkeran bigîrê û nê girewtişî de zî do sîstemê fermuarî pê bîyarê.
Kurdistan de sey xeylêk şaredarîyan yê Misircî ya Sêrtî de zî qeyûman ame tayînkerdiş. Partîya Têduştî û Demokrasî (DEM Partî) şaredarî qezenc kerd û hemşaredarî ameyî serê wezîfeyî dîyar kerdî ke qeyûm 165 mîlyon û 54 hezar û 607,84 TL deyn verdayo. Hemşaredaran sey pêro şaredarîyanê bînan, pêwa deyn û bêîmkanî şarî rê xizmetê xo dewam kenê.
Hemşaredara Misircî Sadiye Aktîn, ajansê ma JINNEWSî rê qisey kerd û da zanayîş ke qeza de qeyûm tu xizmet nêkerdo.
‘Tehemulê înan nameyê cinîyan rê çin o’
Sadîye wina qal kerd: “Derheqê lazimîyê şarî de tu çîyêk nêameyo kerdiş. Ne rayîr, ne awe, ne vurnayîş, ne tesîsê komelî, ne zî derheqê tutan de tu çîyêk nêameyo kerdiş. Parkê Cinîyan ê Berfîn est bî. Nameyê ci zî vurnayê kerdê Bariş Manço Parki. Tehemulê înan nameyê cinîyan rê zî çin o. Çi destê ma rê bêro ma do bikerê. Sere de zî semedê cinîyan. Nika Şaredarîya Misircî de di xebatkarê cinî est ê. Kombîyayîşê ewilî de cinî çinbî. No tesîrêk pîl mi ser o kerd. Ma hewl danê embazê cinîyan reyde nê arê bidê.”
‘Ma firina nanê şarî akenê’
Sadîye dewam de wina vat: “Şarê ma vayîya nanî ra zaf gerrekerdox o. Ma waşt firina şarî abikerê. Ma do proseso bêro de firine abikerê. Yew zî waştişê cinîyan keyeyê şînî yê cinîyan o. Cinî nê hetî ra zehmetîyan ancenê. Proseso bêro de ma do abikerê. Ancî nokteya otobusê şaredarîye de zehmetî yenê antiş. Ma do aşmêke dima di otobusê şaredarî yê mîyanê bajarî bikerê xizmet.”
‘Cinî semedê karî muracat kenê’
Sadîye tewr peyîn wina vat: “Cinîyan ewilî semedê xo nê semedê merdimanê xo kar waştî. Nika ma sey şaredarî ganî 25 karkeran bigîrê. Wextê girewtişê nê karkeran de zî ma do têduştîyê cinî û camêrdan biewnê, ma do sîstemê fermuarî pê bîyarê. Qeyûman ra xeylê deynî mendê. Rayîr, binesazgehî xeylêk xirab ê. Roja ke ma ameyê ma semedê awe têkoşîn kenê. Ma hewl danê çareserîyêk mende de bivînê. Pêwa pêro bêîmkanî ma xebatanê xo kenê.”