![](/staticfiles/news/237137/2024/07/06/823x463cc-mrz-06-07-24-gencler-tecrit-isgal-eylemi.jpg)
Ciwanan ra çalakîya hemverê tecrîd û îşxalkerdişî
- 15:06 6 Temmuze 2024
- NAROJANE
MERKEZÊ XEBERAN - Bajarê Draguignanî yê Fransayî de, endamê CKFyî tecrîdê serê Rayberê PKKyî Abdullah Ocalanî û hêrîşê îşxalkerdişî yê Başûrê Kurdistanî protesto kerdî.
Bajarê Draguignanî yê Fransayî de, bi serkêşîya endamê Ciwanê Kurdistanî yê Fransa (CKF) rayîrşîyayîşêk ame organîzekerdiş. Ciwanî semedê Rayberê PKKyî Abdullah Ocalanî vejîyayî raşteyan û tecrîdê Îmraliyî protesto kerdî ke 40 aşmî yo xebere Abdullah Ocalanî ra nîna girewtiş. Sewbîna ciwanan hêrişê dewleta tirkan ê faşîstî yê serê Başûrê Kurdistanî û xeta xiyanetê PDKyî zî lanet kerdî.
Rayîrşîyayîş Draguignan La Poste dest pêkerd û heta awanîya walîtî dewam kerd. Bêmabên sloganê, “Bijî Serok Apo” û bi franskî zî sloganê “Rayber Apo rê azadî” ame berzkerdiş. Girseyê ke resa ver awanîya walîtî, semedê vîrardişê şehîdê Kurdistanî deqeyêk rêz girewt û dima ra eşkerayî da. Serê nameyê ciwanan Erhan Kop eşkerayî da û vat: “Heta ke tecrîdê serê Rayber Apo bêro şiknayîş, sey ciwanê kurdî yê Ewropa ma do timî raşteyan de bê. Çareserîya pêro problemê Rojhelatê Mîyanên, Rayber Apo yo.”
Çalakî de pankartê ke bi franskî serê “îşxalkerdişê tirkî rê peynî” û “Abdullah Ocalanî rê azadî” ameyî nuştiş û flamayê Rayberê PKKyî Abdullah Ocalanî ameyî berzkerdiş.