COLEMÊRG - Dayika Delal Nûda Avend ya ku li Geverê di temenekî ciwan de tevlî têkoşîna jin û ciwanan bûbû, di sala 2015'an de jî tevlî refên gerîla bûbû û di 5'ê Îlona 2022'yan de jiyana xwe ji dest dabû Îran Çogaç derbarê têkoşîna keça xwe de axivî û got: "Em bi têkoşîna ku keça me meşandiye serbilind in. Em ji bo Rêberê xwe azadiyê dixwazin."

 

Li gelek deverên Kurdistanê, bi pêşengiya Komeleya Alîkarî, Piştevanî, Yekitî û Çandê ya ji bo Malbatên ku Xizmên xwe li Dergûşa Şaristanêyê Winda Kirine (MEBYA-DER), çalakiyên bibîranînê hatin lidarxistin. Yek ji wan cihên ku ev çalakiyên bibîranînê lê hatin lidarxistin jî navçeya Geverê ya Colemêrgê bû. Li Geverê di rojên 25, 26 û 27'ê Tebaxê de çalakiyên bibîranînê hatin lidarxisitn. Malbata Delal Nûda Avend (Ferah Çogaç) a ku di 5'ê Îlona 2022'yan de jiyana xwe ji dest dabû jî beşdarî van çalakiyan bû.

 

Delal Nûda Avend kî ye?

 

Delal Nûda Avend (Farah Çogaç), ya ku jiyana xwe di nava têkoşîna azadiyê ya jinên Kurd de ji nû ve ava kir, cara ewil di temenekî ciwan de tevgera azadiya kurd nas kir. Piştî ku di sala 2006'an de beşdarî çalakiyên Ciwanên Welatparêz ên Şoreşger bû, wê di rêxistinkirina ciwan û jinan de berpirsiyarî girt ser xwe û xeta azadiya jinê kir xala sereke ya jiyana xwe. Nûda Avend têkoşîna xwe ya ku li bajêr dest pê kiribû, bi tevlîbûna nava refên gerîla di sala 2015'an de veguhast qadeke nû; ligel çalakiyên xwe yên li Zap û Avaşînê, wê têgihiştina xwe ya derbarê îdeolojiya azadiya jinê de kûrtir kir.

 

Delal Nûda Avend ne tenê bi gotinan, lê di her warê hebûna xwe de têkoşîna ji bo jiyaneke azad û rêxistinkirî ya jinan pêş xist; her wiha wê perwerdeya tibî ya ku wergirtibû, ji bo dermankirina hevalên xwe yên di şer de birîndar bûbûn, bi kar anî.

 

Rêwîtiya Delal Nûda Avend ya têkoşînê ku bi çalakiyên ciwanan li Geverê dest pê kiribû, veguherî pratîkeke jiyan û berxwedanê ya ku xwe dispêre azadiya jinê; wê jiyaneke ku bi têkoşîna azadiya jinê hatibû avakirin li pey xwe hişt. Çîroka Delal Nûda Avend, çîroka jineke ji Geverê ye ku xwe bi rêya têkoşînê pênase kir û li pey azadiyê çû.

 

Delal Nûda Avend di sala 2022'an de beşdarî berxwedana li herêma Şikefta Birîndara ya Zapê bû û di 5'ê Îlona 2022'yan de jiyana xwe ji dest da.

 

Îran Çogaç behsa jiyan Û têkoşînAkeça xwe, Delal Nûda Avend (Ferah Çogaç) kir.

 

Îran Çogaç anî ziman ku Delal Nûda Avend di salên xwe yên dibistanê de bi serkeftin û kedkariya xwe bandor li her kesî dikir; her wiha diyar kir ku keça wê zanîngeh qedandiye û dema li benda tayînkirina xwe ya fermî ya kar bûye, li marketekê xebitiye. Îran ÇoGaç got: "Berî ku tevlî tevgerê bibe, ew gelekî kûr difikirî û gelek caran li dûr dinêrî. Me tim dipirsî ka çi bûye, lê wê israr dikir ku tiştek tune ye û baş e. Delal, ku bi gelemperî her şev pirtûk dixwend, wê şevê nexwend. Gava em sibê ji xew rabûn, me bihîst ku Delal ji malê derketiye û tevlî refan bûye. Birayên wê û ez li her derê li wê geriyan lê me ew nedît; paşê agahî hat ku ew tevlî tevgerê bûye. Birayê wê û ez çûn pey wê da ku wê bibînin, lê me nikaribû wê herêma ku ew lê bû bibînin, lewma em vegeriyan. Meh û sal derbas bûn, lê me êdî qet keça xwe nedît. Bi salan, tenê min dixwest ku dengê wê bibihîzim, lê ez bi hesreta wî dengî mam."

 

‘Em bi têkoşîna keça xwe serbilind in’

 

Dayik Îran ÇoGaç, bi nîşandana serbilindiya xwe ya li hember têkoşîna keça xwe, wiha got: "Delal di şerê Efrînê de jî cih girt. Wê li wir şer kir û nûçeya birîndarbûna wê gihîşt me. Paşê me bihîst ku ew baş bûye û ji bo berdewamkirina têkoşînê çûye Qendîlê. Dema li Geverê qedexeya derketina derve hat ragihandin, Ferah kûr bandor bûbû; wê nikaribû li hember tiştên ku diqewimîn bêdeng bimîne û got: 'Ez ê ji bo gelê xwe û ji bo zarokan şer bikim.' Bi salan ji bo gelê xwe şer kir û şehîd ket. Em bi wê serbilind in, ji ber ku wê jiyana xwe bi awayê ku dixwest, jiya.."

 

‘Em azadiya Rêberê xwe dixwazin’

 

Îran Çogaç, bi gotina ku gel xwedî li merasîma bîranînê ya li Geverê ji bo şervanên azadiyê yên jiyana xwe ji dest dane derket û ku çalakiyeke bi bandor bûwiha got: "Li wir her kesî ji bo şehîdan ked da û eleqe nîşanî me da. Ez sersaxiyê ji Rêberê xwe û gelê Kurd re dixwazim. Pêvajoyek heye û em dixwazin ew pêvajo pêş ve biçe. Em azadiya Rêberê xwe dixwazin. Em amade ne ji bo serkeftina pêvajoyê çi pêwîst be bikin. Me zarokên xwe winda kirin, lê daxwaza me ew e ku gerîlayên mayî bigihîjin malbatên xwe."