Have Elma

 

SILÊMANÎ - Rêxistina Azadbûn ji bo Tiwanasazî, Takgerayî û Geşepêdana Mirovî, gelek rojnamevan, aktîvîst û rêxistinên jinan daxwaz kirin ku Encûmena Bilind a Fetwa biryarên xwe paşde bikişîne. Her wiha jinê Silêmanîyê jî bertek nîşanî biryarê dan û nêrînên xwe parve kirin. 

 

Li navenda Rêxistina Azadbûn ji bo Tiwanasazî, Takgerayî û Geşepêdana Mirovî ya Silêmaniyê der barê biryarên Encûmena Bilind a Fetwa ya girêdayî Yekîtiya Alimên Îslamî ya Herêma Kurdistanê daxuyaniyeke çapemeniyê hat lidarxistin.

 

Tevî Rêxistina Azadbûn ji bo Tiwanasazî, Takgerayî û Geşepêdana Mirovî,  Rêxistina Geşepêdana Xelk, Rêxistina Geşepêdana Demokrasî û Mafê Mirovan (DABÎN), Koma Balansî Cênder, Encûmena Bilind a Xaniman, parlamenter, rojnamevan û aktîvîstên jin tevlî daxuyaniya çapemeniyê bûn.

 

Beyannameya ku li ser navê jinan arasteyî raya giştî, Parlamentoya Herêma Kurdistanê, Serokatiya Herêma Kurdistan, Serokatiya Encûmena Wezîran, Encûmena Dadweriya Herêma Kurdistan, Encûmena Bilind a Fetwa ya girêdayî Alimên Îslamî ya Herêma Kurdistanê,  Neteweyên Yekbûyî, balyozxane û konsolosxaneyên welatan, sazî û rêxistinên ragihandin û civakên sivîl hat kirin, ji aliyê rojnamevan û aktîvîst Niyaz Ebdulah ve hat xwendin.

 

Di beyannameyê de hat diyarkirin ku fetwaya 4’ê Kanûnê ya Encûmena Bilind a Fetwa ya Yekîtiya Alimên Îslamî yên Herêma Kurdistanê li dijî mafên di destûra bingehîn a Iraqê, yasayên Herêma Kurdistan û Danezana Gerdûnî ya Mafên Mirovan de hatine diyarkirin e.

 

Di dawiya beyannameyê ev xal hatin destnîşankirin:

 

* Encûma Bilind a Fetwa divê fetwayê paşde bikişîne, dest ji her fetwa û daxuyaniyên li hember jinan dibin sedema heqaretê û zewtkirina mafên wan. Pêwîst e Yekîtiya Zanayan rêz ji azadiya takekesî û mafên mirovan re bigire.

 

*Em daxwaz dikin ku ji jinan û kasibkarên ajokaran lêborîn bê xwestin ku weke metirsiyê li ser civakê rû da.

 

*Pêwîst e li hember jinan zemîna çêbûna sûcan neyê hiştin. Bi vê wesîleyê dezgeha ewlekariyê û dadgeh bicihanîna yasayan bi rol û erkên xwe rabin.

 

*Wezareta Ewqaf û mamostayên ayînî divê zindîkirina aştiya civakî û dûrketina heqareta li hember jinan ji xwe re weke rol bibînin.

 

Hat zanîn ku ev beyanname ji aliyê zêdetirî 200 jin û mêr ve hat îmzekirin.

 

'Em vê biryara ku li dijî jinan bêrêzdariyê nîşan didin qebûl nakin'

 

Endama Yekîtiya Jinên Kurdistanê Leyla Abdullah wiha got:"Em vê biryara ku li dijî jinan bêrêzdariyê nîşan didin qebûl nakin. Ev di heman demê de derstdirêjiya li dijî mêran e jî. Divê mêr jî li dijî vê birayarê rabin. Divê em jin hemû li dijî biryarên bi vî rengî yên li dijî azadiya jinê rabin."

 

'Biryara Encûmena Bilind a Fetwa bêrêzdariya li dijî jinê nîşan dide'

 

Sêwam Rustem wiha got:"Biryara lijneya fetwa bêrêzdariya li dijî jinê nîşan dide. Bi vî rengî jinê biçûk û tenê wekî alavek zayendê dibîne. Ev bêrêziya li hemberî tevahî mirovan e."

 

'Ji bo pêşî li azadiya jinê bê girtin biryarên bi vî rengî didin'

 

Huzan Hesen:"Ji bo pêşî li azadiya jinê bê girtin biryarên bi vî rengî didin. Ev nayê qebûlkirin. Em ê her dem li dijî biryarên bi vî rengî derkevin.

 

'Em ê li berxwe bidin'

 

Gelawêj Îsmaîl jî wiha got:"Ji bo jinan hepsî nava çar dîwaran bikin biryarên bi vî rengî didin. Lê em jin nakevin nava çar dîwaran û em ê li dijî biryarên bi vî rengî li berxwe bidin."

 

'Ev ne biryarek rast e'

 

Her wiha ajokarê taksiyê Fehmî Îzet jî nerazîbûna xwe ya li dijî vê biryarê da û wiha got:"Ev ne biryarek rast e. Ev biryar hem bandorek neyînî li ser civakê dike hem jî li ser aboriyê dike."