WAN - Festîvala Keda Cinîyan ê Berardene ke hetê şaredarîyanê girêdayîyê Partîya Têduştî û Demokrasiyî yê Şaran (DEM Partî) ra virazîyena, Meydanê Bajarî yê Wanî de dest pêkerd.

 

Pankartê bi nuşteyê "Festîvala Keda Cinîyan a Berardene" wareyê festîvalî de ameye daliqnayene. Zaf cinîyî tewrê festîvalî bîyî, mîyanê înan de Hemsereka Şaredarîya Bajarê Pîlî ya Wanî Neslihan Şedale û Hemsereka Şaredarîya Bajarê Pîlî ya Mêrdînî Devrim Demire estbîyî ke qeyûmî ameyî tayînkerdene. Kombîyayîşê hîrê rojan ke şaredarîyanê qezan, dezgehanê cimatê sivîlî û kooperatîfanê cinîyan daxil bî, do kede, berardiş û berardişê kulturî-hunerî yê cinîyan bimojno. No faliyet do bibo wesîla ke cinî hem berardeyê xo bidê naskerdene hem zî paştdayîşê yewbînan xurt bikerê.

 

‘Têkoşînê ma do dewam bikero’

 

Hemserekê Rêya Armûşî Canan Uzunaye qiseykerdişê xo yê akerdişê kombîyayîşî de bale ant serê xurtkerdişê keda cinîyan. Canan Uzunaye va: "Ez wazena nê çîyî qeyd bikera ke têkoşînê ma do dewam bikero seba ke cinîyî semedê keda xo tezmînatêko adil bigîrê."

 

'Ganî tewrbîyayîşê cinîyan her ware de bêro naskerdene'

 

Dimayê nê çîyî, Hemserekê Şaredarîya Bajarê Pîlî ya Wanî Neslihan Şedale muhîmîya festîvale seba cinîyan dîyar kerd û ard ziwan ke ganî tewrbîyayîşê cinîyan her ware de bêro naskerdene. Neslihan Şedale va: "O wext ke ma şaredarîyî girewtî, ma va ke ma do bi cinîyan îdare bikerê. Labelê, polîtîkayê qeyûmî tewr verê cû dezgehê ma yê cinîyan girewtî. Kurdistan de polîtîkayê şerê taybetî est ê. Gulistan Doku, Îpek Er û Narin Guran mîsalê nê çîyî yê. Têkoşînê ma yo vera nê polîtîkayanê şerê taybetî do dewam bikero."

 

Dimayê qiseykerdişan, koma Nuda Gowend vejîya sehne ser. Dima ra cinîyan zîyaretê standan kerd. Govende ameye kerdiş.

 

Festîvale do saete 5ê şanî de bi konserê hunermende Zozan Alpe dewam bikero.