STENBOL - Di nêweşê tepişteyî Dîlek Oz û Sureya Bulut yê ke 32 serrî Zîndanê Cinîyanê Bakirkoyî de tepişte bîyî, ameyî veradayîş.

 

Sureyya Bulut û Dîlek Oz hetê keyeyê xo, îdarekarê Komeleya Hemkarîya bi Keyeyê Tepişteyan û Mehkûmanê Marmarayî (MATUHAY-DER), Komeleya Hetkarî û Piştîdayîşê bi Keyeyê Kesanê Vîndabîyaye yê Anatolyayî (ANYAKAY-DER), Têgêrayîşê Cinîyanê Azadan (TJA), Dayîkanê Aştîye, DEM Partî û DBPyî û zafê kesan dir bi vilan, tîlîliyan û berzkerdişê sloganan ameyî pêşwazîkerdiş. Pêşwazîkerdiş de girseyî sloganê “Bijî berxwedana zîndanan” û “Jin Jiyan Azadî” berz kerd.

 

Dimayê Sureyya Bulut û Dîlek Oz zîndan ra vejîyayî, kevok pernayî û vernîya zîndanî de qisey kerdî.

 

‘Azadîya ma nîmced a, çimkî Serekê ma hema tepişte yo’

 

Vernê de Sureyya Bulut qisey kerd. Sureyya Bulut dîyar kerd ke dimayê serrê dergan ê vejîyayî û wina va: “Yew hetê ma bi kelecan o, heto bîn ra zî ma xemgîn ê. Bi hezaran hevalê ma hema zîndanan de yê. Azadîya ma nîmced a, çimkî Serekê ma hema zîndan de yo. Şarê ma heqanê xo bidest nêkerd. Nê semedî ra eke ma teber de bê zî ma nêşenê vajê ma azad ê. Serrê dergî yê ma zîndan de yê. Sîstem semedê ke têkoşînê ma qels bikero zaf çî kerd. La na rastî şarê ma de ruhêk awan kerd. Dimayê 32 serrî ma bi eynî ruh û kelecanî teber de yê. Ma zanayîne ma kengê bivejê, do şarê ma ma xo verike bikero û pêşwazî bikero. Prosesê ewroyî zaf muhîm o, berpirsîyarî kewena milê ma hemine. Ma do goreyê nê têbigêrê. Ma do cimatêk demokratîk û komunal awan bikerê. Bi nê kelecanî ma vejîyayî.”

 

‘Ma do ser sûranê Amedî de govende bigeyrênê’

 

Dîlek Oz zî dîyar kerd ke no di serrî yo zîndan de înan ra persenê “şima poşman ê” û wina qisey kerd: “La ma vat, ma tu çîyêk nêkerd ke ma poşman bê. 32 serrî vîyart, ma ciwanî kewtî zîndan û ma ciwan vejîyayî. Ez sey cinîyêka kurde serberz a ke bi hawayêk serberz zîndan ra vejîya. Silamanê hevalanê ma estbî, vatişê ma vatişê înan ê. Tîya ra silam şirawenê Serok Apoyî rê, ma hêvîdar ê ke o zî do bêro û ma do şêrê sûranê Amedî ser o govende bigêrênê.”

 

Dima ra Sureyya Bulut û Dîlek Oz bi girseyî kewtî awanîya DEM Partî ya Qezaya Bahçelîevlerî.