MERKEZÊ XEBERAN- Goreyê raporanê ke hetê Meclîsê Weşîye û Ewleyîya Karî (îSÎG) ra ameyê weşanayene, aşma gulana 2026î de tewr kêmî 212 karkerî cînayetanê karî de cuya xo ra bîyê. Sewbîna, mîyanê serranê 2013-2026î de demê gurîyayîşî de tewr kêmî 862 gedeyî cuya xo ra bîyê.

 

Meclîsê Weşîye û Ewleyîya Karî, Raporê Cînayetanê Karî yê Gulana 2026î eşkera kerd. Goreyê raporî, aşma gulane de tewr kêmî 212 karkerî cînayetanê karî de cuya xo ra bîyê.

 

Mîyanê sebebanê mergê karkeran de; qezayê trafîk û servîsî bi nisbetê %24î rêza ewiline de ca girewt. Mergê rîyê krîzê qelbî û mezgî ra gonîameyîşî ra bi nisbetê %17î, pelçiqîyayîş û piroginayene de zî bi nisbetê %16î ameyî qeydkerdene.

 

Raporî de goreyê beşanê karî ameyo dîyarkerdiş ke tewr zaf mergî warê zîret û daristandarîye, înşat, barkerdiş û xizmetanê şaredarîye de bîyê. Warê dewan û şaristanan de 48, awankerdiş û rayîran de 38, barkerdişî de 33, şaredarîye û karûbaranê pêroyîyan de 16 û sektoranê tîcaret-perwerdekarîye de zî 11 karkerî cuya xo ra bîyê.

 

Eşkera bi ke karkeranê ke cuya xo vîndî kerda, înan ra 13 kesî cinî, 199 kesî camêrd bîyê; sewbîna mîyanê mergan de 7 karkerê gedeyî û 16 karkerê koçberî est ê.

 

Meclîsê ÎSÎG’î, seba “12ê Hezîrane Roja Têkoşînê Vera Karkerîya Gedeyan a Dinya” na rewşe de “Raporê Ciyanetanê Karî yê Gedeyan” zî şarî reyde pare kerd.

 

Goreyê raporî, mîyanê serranê 2013 û 2026î de tewr kêmî 862 karkerê gedeyî demo ke xebitîyayêne, cuya xo ra bîyê. Sebebanê mergê gedeyan de qezayê trafîk û servîsî bi nisbetê %27î rêza ewiline de ca girewt. Naye ra dima zî bi nisbetê %16î fetisîyayîş û jehrîbîyayîş, bi nisbetê %14î pelçiqîyayîş û piroginayîşê herre ca girewt.

 

Raporî de sewbîna ame dîyarkerdiş ke gedeyanê ke ciyanetanê karî de wefat kerdo, înan ra tewr kêmî 100 gedeyî koçber bîyê.