WAN - Sîyasetmedarê cinî dîyar kerdî ke, bêstatûya Rayberê Şarê Kurdî Abdullah Ocalanî prosesê aştîye nêeşkeno bidomîyo û va: “Ma serekê xo ra bawer ê, ma paştî danê ci. Berpirsîyarîyê prosesê aştîye keweno serê milê ma heme merdiman.”

 

Prosesê Aştî û Cimatê Demokratîkî yo ke bi vengdayîşê Rayberê Şarê Kurdî Abdullah Ocalanî ameyo destpêkerdiş, dewam keno. Serê nê vengdayîşî, PKK’yî kongreya xo viraşte. PKK’yî serrgêra 12ine yê kongreya xo de eşkerayîyêka çapemenîye da û bale ant serê prosesê "Aştî û Cimatê Demokratîkî". Eşkerayîye de ameye dîyarkerdiş ke ganî şert û mercê azadîya Abdullah Ocalanî bêrê caardiş û va ke semedê newe ra awankerdişê prosesî, ganî kanalê çareserî û dîyalogî bêrê akerdiş.

 

Hemsereka Komeleya Paştîdayîşê bi Keyeyanê Tepişteyan (TUHAY-DER) ê Wanî Rengîn Karadumane û hemsereka Partîya Herêmanê Demokratîkan (DBP) ya Îpekyoluyê Wanî Şengûl Aci derheqê prosesî de qisey kerd.

 

‘Dewlete nêwazena proses pozîtîf bidomîyo’

 

Şengûl Aci da zanayene ke proses serrêke ra zêde yo dest pêkerdo û hetê îqtîdarî ra gamêka somute nêameya eştiş û wina va: “Rayber Apo û têgerayîşî berpirsîyarîyê xo ardî ca. Dewlete nêwazena proses pozîtîf bidomîyo. Ma serekîya xo ra bawer ê. Ma her wext hetê serekê xo de yê. Ma berpirsîyarîyê xo ardî ca.”

 

‘Ganî semedê serekî statû bêro şinasnayîş’

 

Şengûl Aci dewamê qiseykerdişê xo de ard ziwan ke ganî demêkê nêzdî de semedê Rayberê Şarê Kurdî Abdullah Ocalanî statû bêro şinasnayîş û va ke averşîyayîşê prosesî tena semedê şarê kurdî nê, semedê heme şaranê dinya hewcedarîyêk mûhîm o. Şengûl Aci nê çîyî vatî: “Dewlete wexto ke kewena zor, yena hetê şarê kurdî. Ma nê qebûl nêkenê. Wexto ke semedê serekî statû bêro şinasnayîş, o wext rayîrê hevalanê ma yê zîndan û surgunî do bêro akerdiş. PKK’yî çekan verda, labelê semedê înan tu qanûn nêvetî. Ma nê qebûl nêkenê. Ganî semedê serekî statû bêro şinasnayîş.”

 

‘Mîyanê çar dêsan de tu kes nêeşkeno sîyaset bikero’

 

Hemsereka TUHAY-DERî ya Wanî Rengîn Karadumane zî eşkera kerd ke serê prosesî ra serrêk vîyarto û va ke proses nêeşkeno yewhetî bêro domnayîş. Rengîn Karadumane nê çîyî ardî ziwan: “Ganî îqtîdar demêkê nêzdî de game bierzo. Rayber Apo û têgerayîşî berpirsîyarîyê xo ardî ca. Ganî semedê Birêz Ocalanî statû bêro dayîş. Ganî dewlete game bierzo. Birêz Ocalan aktorê sereke yê prosesî yo. Proses yewhetî nêeşkeno bêro domnayîş. Tena bi waştişî nêbeno. Ganî pratîk de gamê somutî bêrê eştiş. Ganî serrastkerdişê qanûnî bêrê kerdene. Ganî heqî bêrê şinasnayîş.”