MÊRSÎN – Dayîkê Aştîye Mêrsîn de semedê mitîngê “Hêvî û Azadîye” ke do 4ê Çeleyî de Amed de bêro viraştiş, vengdayîşê tewrbîyayîşî kerdî.

 

Meclîsê Dayîkanê Aştîye yê Mêrsînî derheqê mitîngê “Hêvî û Azadîye” ke do 4ê Çeleyî de Meydanê Îstasyonî yê Amedî de bi waştişê azadîya fîzîkî ya Rayberê Şarê Kurdî Abdullah Ocalanî bêro viraştiş, eşkerayîye dayî. Eşkerayîye awanîya komeleyî de ame dayîş û zaf merdimî tewr bîyî.

 

Dayîka Aştîye Emîne Eren eşkerayîye de bale ant ser muhîmîyê mitîngî û va: “Heta aştî nêbo nê welatî de do merdiş û varnayîşê hêsiran kêmî nêbo. Ma êdî nêwazenê merdişî virazîyê û dayîkî bibermê. Semedê nê zî ganî her kesê wayîrê wîcdanî Amed de tewrê mitîngî bibê. Bi taybetî ganî şarê Amedî na babete de xesas têbigêro.

 

Semedê azadîya Rayberê xo ganî ma uca de bê. Heta Rayberê ma azad nêbo do tu kes ma ra nêeşko azad bibo. Eke ma wayîrê xo nêvejîyê kes wayîrê ma nêvejîyeno. Sey Dayîkanê Aştîye yê Mêrsînî ma do tewrê mitîngî bibê. Şarê ma yê Mêrsînî ke wazeno tewrê mitîngî bibo, eşkenê rêxistinê DEM Partî yê qezayan de nameyê xo binusnê.”