WAN - Rojnamegere Oznur Deger hetê Ozcan Pulat ra amebî tehdîtkerdiş. Derheqê Ozcan Pulat de dewa ameye akerdiş û kerdoxî ameyî cezakerdiş. 

 

Rojnamegere Oznûr Deger 29ê teşrîna verêne 2024ine de xeberêka bi sernameyê "Çeteyê şantajî yê Wanî: Ozcan Pulat kam o?" viraşt. Xebere de ame dîyarkerdiş ke Ozcan Pulat, bi tiryakî xeylêk cinîyan xapênayo. Cinîyê ke şîdet û tehtîdan dir rî bi rî mendê mecbûrê vatişê Ozcan Pulat qebûl kerdê. Xebere de ame vatiş ke ewilî nê cinî bi sozê karî yenê xapênayîş, tiryak û alkol danê cinîyan. Dima ra fotografê înan ancenê û tehdît kenê. 

 

Dimayê xebere, rojnamegere Oznur Deger hetê Ozcan Pulat ra ameye tehdîtkerdiş. Oznur Deger hemverê tehîdan Serdozgerîya Komare ya Wanî gerre kerd. Dima ra derheqê Ozcan Pulat de dewa ameye akerdiş. Îdîanameyo ke hetê Serdozgerîya Komare ya Wanî ra 12ê êlule de ame amadekerdiş, 9ine Dadgeha Cezaya Asli rê ame şirawitiş. Dadgerî ceza Ozcan Pulatî rê birna.