Neslîhan Kardaş

 

ŞIRNEX– Seher Şengullu Yilmaz derheqê prosesî ke bi vengdayîşê Rayberê Şarê Kurdî Abdullah Ocalanî dest pêkerd û serrêke yo dewam keno qisey kerd û va: “Ma Tirkîyeyêka ke pêro welatijî û şar xo cîya nêhesibneno awan bikerê, o wext ma eşkenê behsê aştîye, demokrasî û têduştîye bikerê.”

 

Dimayê vengdayîşê ‘Aştî û Cimatê Demokratîkî’ ke Rayberê Şarê Kurdî Abdullah Ocalanî dest pêkerd Tirkîya û Kurdistan de prosesêko newe dest pêkerd. Vengdayîşo ke pêro Kurdistan, Tirkîya û Rojhelatê Mîyanên de ame dayîş dinya de veng da. Prosesî dir zaf gamê zelal ameyî eştiş. Labelê hetê îqtîdarî ra hema gamêke zelal nêameyê eştiş. No zî rayîr ver bi awankerdişê aştî û cimatê demokratîk padano.

 

Sereka Pêroyî ya Komeleyanê Kulturê Elewîyan Seher Şengullu Yilmaz derheqê prosesî de ajansê ma rê qisey kerd.

 

‘Hetêk bi waştiş heto bîn meşgûlkerdiş’

 

Seher Şengullu Yilmaz da zanayîş ke lazimîya şarî bi aştî, têduştî û demokrasî est a û va: “No welat de qiseykerdişê aştîye hêvî dano. Proses hîn erey yan zî yeno xetimnayîş. Hetêk bi waştiş heto bîn hîn meşgûl keno. No welat de yew cimato ke tewr lazimîya ci aştîye est o elewî yê. Ma Mereş ra yenê tîya û nika ma Şirnex de yê. Ma canê xo yê 47 serrî verê Mereş de ameyî qetilkerdiş yad kenê.”

 

‘Belê na aştî do bêro’

 

Seher Şengullu Yilmaz va şarê elewî piştdayîş dano prosesî û wina va: “Hetêk têkoşînê bi serran domna, bi gamêke peynî kerd. Labelê ewro ê ke welat îdare kenê tay xo danê kîşte. Birêz Bahçelî bi cesaret têgêreno. Serdayîşê Îmraliyî gamê tarîxî yê. Labelê hemkarê îqtîdarî hîn zor danê. Belê na aştî do ca bêro. Her kes pawe yo. Ganî herdi hetî zî samîmî bê. Ganî dejî dir, heqîqetî dir rî bi rî bêrê.”

 

‘Ma waştişê xo newe ra reyna kenê’

 

Seher Şengullu Yilmaz da zanayîş ke pêro hetê cimatî babeta aştîye de hemfikir ê û va: “Ma welatêko demokratîk de nêcîwîyenê. Ma rî bi rî yê bêteduştî yê. Ma welatijê elewî her babete de waştişê xo newe ra reyna kenê. Ma do waştişê welatîbîyayîşê têduştî her tim bîyarê ziwan. Ma Tirkîyeyêka ke pêro welatijî û şar xo cîya nêhesibneno awan bikerê, o wext ma eşkenê behsê aştîye, demokrasî û têduştîye bikerê.”