MERKEZÊ XEBERAN - Komîsyonê Cinîyan ê Encûmenê Pawitişê Neteweyî yê Îranî neql kerd ke rewşa tepişteyê sîyasî yê cinîyan ê Zîndanê Evîne xirab a. Ame vatene ke tepişteyî nînê dermankerdiş û no zî rewşa tepişteyê extîyarî û nêweşê demdergan keno mîyanê rîskî.

 

Komîsyonê Cinîyan ê Encûmenê Pawitişê Neteweyî yê Îranî derheqê rewşa tepişteyê sîyasî yê cinîyan ê Zîndanê Evînî de eşkerayîye pare kerde.

 

Eşkerayîye de ame dîyarkerdiş ke 60 tepişteyê sîyasî yê cinîyan Zîndanê Evîne de bi problemanê weşîye rî bi rî yê. Sewbîna tepişteyî bi zanayîş nînê dermankerdiş û no zî rewşa tepişteyê extîyar û nêweşê demdergan keno mîyanê rîskî.

 

Eşkerayîyî de ame dîyarkerdiş ke rewşa weşîya tepişteyanê bi nameyê Fatma Ziyabî, Şiwa Îsmaîlî, Merziye Farsî, Îlahî Fuladî, Tahîre Nûrî û Fewrux Teqî Pur mîyanê rîskî de ya.