Rabîa Onver

 

AMED - Parlamentera û Verfeka Meclîsê Cinîyan ê DEM Partî Halîde Turkoglu derheqê mîtîngê 4ê çeleyî ke Amed de do bêro viraştiş de qisey kerd û va: “Ma 4ê çeleyî de Meydanê Îstasyonî de saet 12ine de semedê azadî û hêvîye yenê têhet. Ma pîya vengê xo berz bikerê.”

 

4ê çeleyî de hetê Platformê Sazgehê Demokratîkan (DEKUP) ra Amed de do mîtîngê ‘Hêvî û Azadîye’ bêro viraştiş. Tena Kurdistan de nê, yeno pawitiş ke her bajarê Tirkîya ra zaf merdimî tewrê mîtîngî bibê. Mîtîng do 4ê çeleyî de Meydanê Îstasyonî de saete 13.00ine de bêro viraştiş. Xebatê semedê mîtîngî dewam kenê.

 

Yeno pawitiş ke Veysî Aktaş û Çetîn Arkaş, hemsereka Pêroyî ya DBP’yî Çîgdem Kiliçgun Uçar, hemserekê pêroyî yê DEM Partî Tuncer Bakirhan, aktîvîsta TJAyî Ayla Akat Ata û sîyasetmedare Leyla Zana mitîng de qisey bikerê.

 

Parlamentera û Verfeka Meclîsê Cinîyan ê DEM Partî Halîde Turkoglu derheqê mitîngî de qisey kerd.

 

‘Ganî derheqê çareserîye de averşîyayîş bêro ca’

 

Halîde Turkoglu bale ant ser vengdayîşê aştî û cimatê demokratîkî û da zanayîş ke vengdayîş pêro dinya, Tirkîya û Kurdistanî de pozîtîf ame pêşwazîkerdiş û va: “Vengdayîş eynî demî de xeta têkoşînê zafhetî yê semedê awankerdişê aştî û demokrasî hewênayîne. Semedê nê zî 27ê Sibate ra heta nika pêvînayîşê şarî dir munaqeşeyê rêxistinî yê girseyî ameyî kerdiş û semedo ke aştî û demokrasî bêro ca çareserîya problemê kurdî keweno dewr. Ganî derheqê çareserîye de averşîyayîş bêro ca.”

 

‘Ganî metodê hêvîye bikewo cuyayîş’

 

Halîde Turkoglu da zanayîş ke prosesî dir zaf gamî ameyê eştiş û komîsyonêko ame awankerdiş û va: “Komîsyon zaf pêvînayîş kerd, peynî de Îmraliyî dir kerd. Awankerdişê aştî û demokrasî bi azadîya Abdullah Ocalanî ca yena. Ganî prensîbê hêvîye bikewo cuye. Muxatab û aktorê çareserîye Birêz Ocalan o. Pêvînayîşê Birêz Ocalanî dir hema sînorkerde yê. Ma do 4ê çeleyî de Meydanê Îstasyonî de mîtîngo ke viraznenê de bîyarê vîr ke aktorê prosesî û muxatabê çareserîye Birêz Ocalan o.”

 

‘Mitîngê 4ê çeleyî muhîm o’

 

Halîde Turkoglu peynîya qiseykerdişê xo de nê çî va: “Vernî de şarê kurdî pêro rêxistinê girseyan ganî mitîng de ca bigîrê. Semedo ke hukmat û komîsyon gamê cidî bierzê no mitîng muhîm o. Ganî her kes rolê xo kay bikero. Ma pîya vengê nê têkoşînî berz bikerê.”