AMED - Hemşaredara Rezanê Amedî Leyla Ayaz dîyar kerd ke sazîyê ke qeyûmî girewtbî nê di serrî newe ra akerdê û va: “Ma taxan, dewan de xebateka hîra domnenê. Cinî tena nîyê, mekanîzmayê ke înan xurt kenê zî newe ra hetê înan de yê.”

 

Şaredarîya Rezanî sazîyê cinîyan ê ke demê qeyûman ra amebî girewtiş, ancî newe ra kerdî falîyet. Bi xebatê xo waştiş û hewcedarîyê cinîyan kenê esas. Hemşaredara Rezanî Leyla Ayaz dîyar kerd ke roja ke ameyî wezîfe xebatê xo domnenê.

 

Leyla Ayaz wina qalê xebatan kerd: “Qeyûmî sazîyê ke şarî pê hewce bîyê qesd kerdbî û girewtbî. Nê di serrî yo ma şaredarî qeyûman ra girewte. Senîn ma ameyî, tena sazîyê cinîyan nê, heme sazî bêtesîr verdayî. Awanî estbî, xebate estbî, labelê hetê xebate ra sazî bêtesîr amebî verdayîş. Bi taybetî sazîyê cinîyan bêtesîr verdayî. Senîn ma ameyî, ma ancî înan aktîf kerd.”

 

‘Ma pabebîyayîşê cinîyan goşdarî kenê’

 

Leyla Ayaz wina domna: “Nika Midurîya Cinîyan bi 5 yewîneyanê cîyayan xizmet domnena. Xebatê psîkolojîk, huqûqî, şêwirmendî û atolyeyan domnenê. Taxan de ma hewcedarî û waştişê cinîyan goşdarî kenê. Nê pêvînayîşî netîceyê xo yê rind danê meydan. Ma taxan û dewan de pêvînayîşan kenê. Nê pêvînayîşan de şîdet û feqîrî vejîyeno meydan. Yewîneyê ma derheqê nê probleman de her tewirê xizmetî domnenê.”

 

‘Demê qeyûman de cinîyan tu xizmet nêgirewte’

 

Leyla Ayaz dîyar kerd ke cinîyan demê qeyûman de tu xizmet nêgirewtî û wina domna: “5 serran ra tu îmkanê şaredarîye ra feyde nêgirewtbî. Semedê nê kêmasî û problemê bînî estbî. Ma cinîyan dir ameyî têhet. Ma do tewr zêde wareyan de cinîyan dir bêrê têhet. Ma do vengê xo berz bikerê. Ma do bi nasnameyê xo, xo bimojnê. Xebatê ma dewam kenê. Semedo ke têduştîya cinsî ya komelkî xurt bibo, ma belgeyêka ke prensîbêk hewênayîne îmza kerde. Ma şaredarîyan dir ‘Belgeya Helwestî’ ya hemverê şîdetî, bêtêduştî û binpaykerdişan îmza kerde. Na belge heme kesî hewênena. Her kes bi asanî eşkeno xo biresno na belge. 14 maddeyanê hîra ra pê ameya.”

 

‘Bi wesîleya 25ê teşrîna peyêne ma lez da xebatan’

 

Leyla Ayaz bale ant ser 25ê Teşrîna Peyêne Roja Têkoşînê Hemverê Şîdetê Cinîyan û va bi nê wesîle ma xebata xo her wareyî de domnenê û wina peynî ard: “Bi taybetî ma dewan û taxan xebatê xo zêde kerd. Tewrbîyayîş û eleqeyê nê xebatan rê zaf rind bî. Ma heme hewcedarî û waştişê cinîyan vernîya çimanê xo de girewt. Semedê nê ma xebatê xo domnenê.”