Evîn Çîftçî

 

RIHA - Dayîka Aştîye Fatma Akbaş, ke dezayê ci 35 serrî yo tepişte yo, wina va: “Eke ma aştîye wazenê, ganî heme tepişteyê zîndanî bêrê veradayîş.”

 

Dimayê vengdayîşê Rayberê Şarê Kurdî Abdullah Ocalanî yê 27ê Sibate, vernîya averşîyayîşê tarîxî ame akerdiş. Nê prosesî de PKK’yî 12ine kongreya xo kerd û qerarê wedartişê têkoşînê çekdarî girewt. Dima ra Têgêrayîşê Azadîya Kurdî 11ê temmuze de bajarê Sîlêmanî yê Başûrê Kurdistanî de merasîmê veşnayîşê çekan kerd. 26ê teşrîna verêne de zî qerarê kiştişê hêzanê xo Vakurê Kurdistanî girewt. Pêwa nê gamê girdan, Rayberê Şarê Kurdî Abdullah Ocalan hîna zî tepişte yo û no zî tesîrêko negatîf keno hîsê şarî ser.

 

Dayîka Aştîye Fatma Akbaş derheqê mesela de ajansê ma rê qisey kerd.

 

‘Rayîrê înan rayîrê heqîqetî yo’

 

Fatma Akbaş va: “Lajê mi prosesê şerî de nê, prosesê aştîye de şehîd kewt” û bale ant ke ê do her tim rayîrê heqîqetî de şêrê. Fatma Akbaş wina domna: “Lajê mi 2004 de tewrê têgêrayîş bi. 2013 de prosesê muzakereyî estbî. Lajê mi ê wextî de şehîd kewt. Ma wina zî proses ra keyfweş bîyê. Labelê lajê mi şehîd kewt. Faqe awan kerdbî û lajê mi ame kiştiş. Ma zî rayîrê înan de şêrê, ma rayîrê heqîqetî de şêrê.”

 

‘Semedê nêvano ‘ez poşman a’, infazê ci 5 serrî yo taloq beno’

 

Fatma Akbaş bale ant ser rewşa dezayê xo yê ke 35 serrî yo tepişte yo û infazê ci 5 serrî yo taloq beno û wina domna: “Ma aştîyêka bi rûmet wazenê. Nika zî vanê prosesêk est o. Labelê lajê xalê mi 35 serrî yo tepişte yo. Persê ‘ti poşman ê?’ hetê înan ra yenê kerdene. O qebul nêkeno. Semedê nê her tim infazê ci taloq beno. Wa serekê ma û heme tepişteyê zîndanî bêrê veradayîş. Ma bedelê girdî dayî. Ê ke qisey kenê wa pratîk de zî bimojnê. PKK’yî qeraro gird girewt. Wa dewlete zî rast û durust bo. Gaman bierzo.”