MERKEZÊ XEBERAN - Aktîvîsta Belûcî ya bi nameyê Turan Hamelzehî ke bajarê Îranşehrî yê Îranî ciwîyena, hetê Dadgeha Şorişî yê Zahedanî ra cezaya peran ame birnayîş.

 

Hemwelatija Belûcî Turan Hamelzehî ke bajarê Îranşehrî yê Îranî ciwîyena, 8ê teşrîna peyêne de, hetê Şubeyê 2yîne yê Dadgeha Şorişî yê Zahedanî bi sûcê “provokekerdişê rayapêroyî” û “propagandayê hemverê rejîmî” 400 mîlyon tûmen cezaya peran ame birnayîş.

 

Goreyê raporê, Turan Hamelzehî destpêk de semedê nê sûcan şeş aşmî cezaya zîndanî ame birnayîş. La avûkatê aye, bi sebebê rewşa weşîye ya nêbaş ê muwekîla xo, waştiş kerd ke cezaya zîndanî biba cezaya peran. Dadgehe nê waştişî qebul kerd û ceza vurna, cezaya peran.

 

Derheqê Turan Hamelzehî de kam ci parekerdişî ser, yan çalakîyan ser o ameya sucdarkerdiş, tu agahî çin a.

 

Turan Hamelzehî, sey aktîvîsta komela sîvîl a Belûcî ya ke Îranşehrî de ciwîyena, verê zî rastê zordarîya hêzanê asayîşî ameya û ameya destbendkerdiş.