Pelşîn Çetînkaya

 

AMED – Hemsereka DBP’yî ya Amedî Rûçem Vefa Elyakut gama tarîxî ya Têgêrayîşê Azadîya Kurdî ser o derheqê ‘prosesê aştî û komelê demokratîkî’ de ercna û va ke gama tarîxî ya ke têgêrayîşê azadîya kurdî eşto israrê waştişê aştîye reyke bîn mojna û va ke qonaxê dîyine yê prosesî de ganî her kes rolê xo bîyaro ca.

 

Derheqê prosesê “Aştî û komelê demokratîkî” ke Rayberê Şarê Kurdî Abdullah Ocalanî 27ê sibate de dest pêkerd de, Têgêrayîşê Azadîya Kurdî 26ê teşrîna verêne de eşkerayîyêke tarîxî da. Têgêrayîşê Azadîya Kurdî eşkerayîya ke da de dîyar kerd ke goreyê qerarê 12ine Kongreya PKK’yî, Hêzê Pawitişê Şarî (HPG) û Yewîneyê Cinîyanê Azad-Star (YJA-Star) “Wareyê Pawitişê Medyayî” ancenê. Eynî wextî de Têgêrayîşê Azadîya Kurdî dîyar kerd ke bi na gama eştişî proses kewt qonaxê dîyine. Şar derheqê na game de reaksîyonê pozîtîfan mojnenê. Partîya Herêmanê Demokratîkan (DBP) ya Amedî Rûçem Vefa Elyakut derheqê prosesî de qisey kerd.

 

‘Hemverê gamanê tarîxîyan hema cewabêk çin o’

 

Rûçem Vefa Elyakut va ke vengdayîşê Rayberê Şarê Kurdî Abdullah Ocalanî dir gamanê tarîxî ameyî eştiş û va: “27ê sibate de bi vengdayîşê ame kerdiş dir kelecan û hêvîyêk gird viraşt. Hêvîya semedê aştîye gird bîya. Vengdayîşê Birêz Ocalanî dir PKK’yî gamanê ciddî û eşkerayan eşt. PKK xo fesh kerd û dima ra çeke veşnayî. Cewabêk ciddî û somut da vengdayîşê Birêz Ocalanî. Nê dir dewlete tenya meclîs de komîsyonêk viraşt. La sey her kes zî zano viraştişê komîsyonî dir hema tu gamek somut nêameya eştiş.”

 

‘Nêgoşdarîkerdişê Abdullah Ocalanî problemêk cidî yo’

 

Rûçem Vefa Elyakut eşkera kerd ke hema aktorê sereke yê prosesî Rayberê Şarê Kurdî Abdullah Ocalan nêameyo goşdarîkerdiş û wina va: “Pêwa nê averşîyayîşê muhîmî, nê gamanê tarîxîyan hema şert û mercê tehdîdî dewam kenê û nêgoşdarîkerdişê Birêz Ocalanî problemêk cidî yo. Ganî dewlete gaman bierzo, gamanê huqûqî, zeminê qanûnî û huqûqî bêro viraştiş. Heto bîn ra Têgêrayîşê Azadîya Kurdî 26ê teşrîna verêne de eşkera kerd ke Wareyê Pawitişê Medyayî rê xo ancenê. Ma zanê ke no proses dinya de veng da.”

 

‘Ganî her kes rolê xo bîyaro ca’

 

Rûçem Vefa Elyakut dîyar kerd ke nê prosesê krîtîkî de ganî her kes berpirsyarîyê xo bîyaro ca û wina dewam kerd: “Ma vînenê ke Birêz Ocalan, Têgêrayîşê Azadîya Kurdî çiqas samîmî nêzdîyê prosesî benê, çiqas aştî wazenê. Ma sey DBP û pêkameyî kombîyayîşê şarî viraşt. Şar ame têhet. Dimayê vengdayîşê 27ê sibate ma kombîyayîş viraşt û ma şarî daxilê prosesî kerd, munaqeşeyan domnayî. Eynî wextî de bi serkêşîya cinîyan proses aver şi û ma cinîyan dir ameyî têhet. Ma ser meselanê ke azadîya cinîyan azadîya komelî ya vindertî û ma pîya xebate, munaqeşe û atolyeyan domna. Wezîfeyê girdî kewenê milê ma ser. Ma nê hişmendîye de yê. Ganî her kes berpirsyarîyê xo bîyaro ca.”

 

‘Bi entegrasyonê demokratîk eşkeno bêro çareserkerdiş’

 

Rûçem Vefa Elyakut peynîya qiseykerdişê xo de bale ante şertanê prosesî ser û va nê bi entegrasyonê demokratîk eşkenê bêrê çareserkerdiş û wina peynî ard: “Ma konseptan zaf kenê têmîyan. Ma derheqê entegrasyonê demokratîkî de qisey kenê. Ma derheqê asîmîlasyonî yan zî helnayîşê şarêk yê mîyanê şarêk bînî de qisey nêkenê. Ma derheqê entegrasyonê demokratîkî de qisey kenê, no zî yeno a mana ke her şar bi kultur, nasname û ziwanê xo xo îfade bikero. Ganî her kes xo rêxistin bikero û no bi no hawa mumkin o. Bi entegrasyonê demokratîkî problemî eşkenê bêrê çareserkerdiş.”