MERKEZÊ XEBERAN - Wendekarê Zanîngeha Kobanî hedîseya kiştişê Rojîn Kabaîşe ya Vakurê Kurdistanî bi eşkerayîyêke şermezar kerd û semedê Rojîne venga edaletî da.

 

Wendekara Zanîngeha Yuzuncu Yilî ya Wanî Rojîn Kabaîşe ke 27ê êlule 2024ine de vînî bî, dimayê 18 rojan cenazeya aye ameye dîyayîş. Na hedîse ke cigêrayîşê ci hema dewam kena, rojeva girde Vakurê Kurdistanî û Tirkîya awan kerd.

 

Derheqê na hedîse de ewro Meclîsê Wendekaranê Zanîngeha Kobanî de eşkerayîya çapemenî da. Eşkerayîye de bi desine wendekarî bi girewtişê fotografê Rojîn Kabaîşe û pankartanê bi nuştişê “Ma heme Rojîne yê” beşdar bîyî.

 

Eşkerayîya ke verê awanîya zanîngehe ameye dayîş, hetê wendekara Hindirîn Hec Mehmûdî ra ame wendiş.

 

Eşkerayîye wina ya:

 

“Ma sey wendekarê Zanîngeha Kobanî, bi xemgînî yadkerdişê Rojîn Kabaîşe anê ziwan û nê kerdişî ra zaf xemgîn ê. Rojîn Kabaîşe kênaya kurde ya Vakurê Kurdistanî bî. Aye Zanîngeha Yuzuncu Yilî ya Wanî de wendekara serra yewine bî, beşê Çocuk Gelîşîmî (perwerdeyê tutan ê destpêkî) wendêne.

 

Ma sey wendekarê Zanîngeha Kobanî nê binpêkerdişî red kenê û semedê Rojîn Kabaîşe û heme binpêkerdişanê hemverê wendekaran û cinîyan waştişê edaletî kenê. Ma sey Meclîsa Wendekaranê Zanîngeha Kobanî, veng danê heme sazîyan, huqûqnasan û meclîsanê wendekaran ke hemverê nê de vinderê. Ma vanê ke ma heme Rojîn Kabaîşe yê.”