Roj Umut

 

ŞENGAL - Hevseroka Desteya Rêvebir a Şengalê Zehra Silêman di derbarê êrîşên dewleta Tirk ên li ser Efrînê de nêrînên xwe anî ziman û got:"Em ê wekî jinên Kurd ên Êzidî xwedî li berxwedana Efrînê derkevin û li dijî pergala ku desthilatdar dixwazin ava bikin, serî hildin."

 

Êrîşên dewleta tirk ên li ser Efrînê ket roja 35'an. Hevseroka Desteya Rêvebir a Şengalê Zehra Silêman di derbarê êrîşên dewleta Tirk ên li ser Efrînê de nêrînên xwe anî ziman û diyar kir ku divê dengê têkoşînê bi dilekî yekpar bilind bibe û em li Efrînê xwedî derkevin.

 

Zehra Silêman diyar kir ku dewleta tirk bi êrîşên li ser Efrînê yekîtiya gelan hedef digire û wiha got:"Êrîşên ku li ser Efrînê tê kirin ji dîrokê ne qute. Ji berê de li dijî çand, huner, ziman û nasnameya Gelê Kurd êrîş tê kirin. Divê Kurd jî ji bo xwedîderketandina nasnameya xwe li axa xwe xwedî derkevin û bibin yek."

 

'Efrîn Şengal e Şengal Efrîn e'

 

Zehra bal kişand ser serîhildana gelê Efrînê û wiha domand:"Ev 35 roj in ku gelê Efrînê li dijî êrîşan serî netewandin û li axa xwe xwedî derdikevin. Em jî wekî jinên Kurd ên Êzidî dibêjin Efrîn Şengal e Şengal jî Efrîn e. Em ê ji dil û can hem li Efrînê hem li Şengalê xwedî derkevin."

 

'Jinên  Efrînê bûne sembola azadiyê'

 

Zehrayê anî ziman ku berxwedana jinên Efrînê hêzê dide mirov û wiha dawî li axaftina xwe anî:"Jinên Efrînê bi berxwedana xwe bûne sembola azadiyê. Divê em hemû jin bibin yek beden û xwedî li Berxwedana Serdemê ya Efrînê derkevin."