Li Nisêbînê di berxwedana rêveberiyên xweser de 83 kesî jiyana xwe ji dest dabû û bi dehan cenaze hîna li goristanên bêkesan in.  Heta îro ku 8 cenaze ji înşata TOKÎ’yê hatin derxistin,bi giştî  56 cenaze li Stenbol, Riha, Mêrdîn û Amedê li goristana bêkesan hatin definkirin.  Malbatên ji bo cenazeyan serîlêdan kirin her carê rastî hincetên cuda hatin û hat hînbûn ku dozgeriyê ji malbatan re gotiye ‘wan cenazeyan ji bîr bikin’.

 

Cenaze hene, herêm nayê kolandin

 

Di hefteyên borî de li taxa Firatê cenazeyek hat dîtin û malbatê ji cil û bergên wî nas kiribû. Cenazeya ku hat îdiakirin a Abdullah Ak e, li gel israrên malbatê, cenaze ji bo DNA’yê biribûn Nexweşxana Dewletê ya Qoserê û ji wir jî biribûn Stenbolê. 

 

Malbatê diyar kir ku ji cihê Abdullah hatiye derxistin hîna bi dehan cenaze hene û şêniyên taxê got bi taybet divê ew herêm bê kolandin.

 

Şêniyê taxê her wiha destnîşan kirin ku şahidiya gelek cenazeyên hatine derxistin kirine û got her roj  di xewnên xwe de kesên jiyana xwe ji dest dane dibînin û got divê demildest înşata TOKÎ’yê bê sekinandin.

 

Hat hînbûn ku malbatên ji bo cenazeyan serî li dozgeriyê didin jî rastî gotinên ‘wan cenazeyan ji bîr bikin’ hatine.