WAN - Îdarekarîya Şubeyê ÎHDyî ya Wanî Ayten Kiran tecrîdê Rayberê PKKyî Abdullah Ocalanî ser û muracatê avûkatan ercna û vat: “Bi seyan avûkatî seba şêrê Zîndanê Îmraliyî bi zerrîwaz muracat kerdî. Çira destûr nêdanê nê avûkatan, gelo çi niminenê?”

 

Îdarekara Şubeyê Komeleya Heqê Merdiman (ÎHD) ê Wanî Ayten Kiran babete ser o ercnayîş kerd.

 

‘Tecrîd sucê merdimayî yo’

 

Aytene ard ziwan ke tecrîdê Îmraliyî 41 aşmî yo yeno kerdiş û no sucê merdimayî yo. Aytene bale ant serê hesasiyetê şarê kurdî û wina vat: "Tecrîd îşkenceyê pêro rêxistinan o, Rêxistina Efûyî ya Mîyanneteweyî zî mîyan de yo. CPT na babete bêveng mendo. Şino Girava Îmraliyî, uca ra vejêno û tu eşkerayî nêdano. Na rewşe şarê kurdî ser o beno sebebê tecrîdêk giran. Nika şarê kurdî derheqê Abdullah Ocalanî de bi endîşeyîn ê."

 

'Zîndan bi pêro herfan ameyî awankerdiş'

 

Aytene, da zanayîş ke Tirkîya de hema hema goreyê pêro herfan zîndanî yenê viraştiş û wina vat: “Hîn roje nêvînenê, hîn wexrê girewtişê hewayî de yewbînan nêvînenê, hîn zî mecbûr manenê ke tenê bimanê. Nê pêro sûcên hemverê merdimayî yê. Îşkence tenê kuyayîş nîyo. Îşkenceyo tewr pîl îşkenceyê fehmî yo. Xora îşkenceyê fizîkî zî dewam keno. Muracatê tewr peyîn Zîndanê Samsûnî de rêça kuyayîşî serê bedenê di tepişteyan de est o. Nê çî nînê qebûlkerdiş. Lazim o Wezaretê Karê Zerreyî û Edaletî semedê nê çareserîyêk lezkî bivînê. Ganî bi vatişê ke her çî bi rêkûpêk o, nêro redkerdiş. Zîndanî birînê Tirkîya yê bi gonî yê, nê îşkence û tecrîd nînê qebûlkerdiş."

 

'Gelo merdimî seba deyîre û govende eşkenê bêrê destbendkerdiş?'

 

Tewr peyîn Aytene vat, “Eke ewro erzîyeno veyvanê kurdan ser û seba govenda ke kerdê yenê cezakerdiş, no zî ancî dewamê tecrîdê Îmraliyî yo. Govende serewedaritişê kurdan a. Wexto ke merdim ci ra ewnîyeno, tecrîdêk est o ke Îmraliyî de dest pêkerd û pêro zîndanê bînan de xo mojna û sey hemleyê peyîn temamê şarê kurdî ser ame kerdiş. Qey merdim seba kilame û govende yeno destbendkerdiş? No kam ci qanûnî de est o? Na rewşêke nîna qebûlkerdiş. Demêk rengê kesk, sûr û zerdî ameyî qedexekerdiş û her kesê ke nê rengan wesayîtê xo daliqnayî ameyî vindarnayîş. Ewro zî hewl danê agêrê ê wextan, la şarê kurdî destûr nêdano sere nêtewêneno. No adetê ma yo û adetê ça nîno tecrîdkerdiş. Ê wazenê her çî îzole bikerê, la ma nê qebûl nêkenê.”