Qamişlo de cinî hemverê şîdetî de rayîr ra şîyî
- 14:14 16 Teşrîna peyêne 2026
- NAROJANE
MERKEZÊ XABERAN – Kongra Starî seba 25ê Teşrîna Peyêne taxa Kornîş a Qamişloyî de rayîrşîyayîşêk organîze kerd.
Çalakîyê 25ê Teşrîna Peyêne Rojê Têkoşînê Verba Tedayê Serê Cinîyan bi sloganê “Semedê peynîardişê tedayê serê cinîyan bibi yew, Jin, Jiyan, Azadî” yenê organîzekerdene.
Kongra Starî taxa Kornîş a Qamişloyî de rayîrşîyayîşêk bi rêxistin kerd.
Rayîrşîyayîş de dimayê rêzgirewtişî eşkerayî bi erebkî û kurmancî ame wendene. Endama meclisê taxa Kornîşî Nadra Îbrahîm bi kurmancî wend û endama Kongra Star a taxa El Tey Yasemîn Îsa bi erebkî wend.
Eşkerayîye de ame vatene ke her kesî ra yeno waştene ke verba tedayê serê cinîyan têkoşîn bikerê. No wezîfeyêk merdimî, exlaqî, cimatî û huqûqî yo. Tedayê serê cinîyan binpaykerdişê rûmet û heqanê cinîyan o.
Sewbîna eşkerayîye de ame vatene ke têkoşînê verba tedayê serê cinîyan teyna slogan nîyo, ganî bidomîyo, îrade wazeno û ganî xo bipawê.
Dewamê eşkerayîye de dîyar kerd ke ganî cimat verba cinsperestî û peygoşkerdişê cinîyan de têkoşîn bikerê û ame vatene ke: “Eke mîyanê cinî û mêrdan de yewbîyayîş nêbo, cimatêk biedalet û têduştî awan nêbeno.
