Polîsê dewaya Gulistan Dokuye: Proses hetê walitî ra ameyîne koordînekerdiş
- 10:35 16 Teşrîna peyêne 2026
- NAROJANE
Şehrîban Aslan
AMED - Polîs Îsmaîl E.yo ke çarçeweya cipersayîşê Gulistan Dokuye de amebi tepiştiş, dîyar kerd ke demê cipersayîşî de înan rê vatîbî ke "keyeyê Gulistan Dokuye nêyeno agahdarkerdiş û proses hetê walîtîye ra yeno koordînekerdiş."
Cipersayîşê vînîbîyayîşê Gulistan Dokuye yê 5ê çeleyê 2020ine de, agahîyê neweyî vejîyenê orte. Derheqê xebata torêk ke hetê walîyê ê demî Tuncay Sonel ra semedê nimitişê cipersayîşî ameybî awankerdiş de detayê neweyî ameyî bidestkerdiş. Operasyonêk ke hemverê şubeyê polîsan ê nimitişê hedîseyî ameybî kerdiş, 19 kesî ameyî destbendkerdiş. Mîyanê kesanê ke ameyî destbendkerdiş de polîs Îsmaîl E. zî bî ke Mudirîya Şubeyê Asayîşî de xebitîyayîne û dima ra amebi tepiştiş. Dimayê tepiştişê ci, ma beşêk ê îfadeyê Îsmaîl E. bidest kerd.
Ame zanayîş ke Îsmaîl E., ke nameyê ci mîyanê şemaya 108 kesan de zî est o, o ke hetê avûkatê dewa Alî Çîmenî ra amebi amadekerdiş, mîyanê polîsanê ke yewser cipersayîşî domnenê de yo. Agahîyêk bîn ê eşkera de no yo ke nameyê Îsmaîl E. hema hema her belgeyê cipersayîşî de vîyareno.
Îsmaîl E. îfadeyê xo de dîyar kerd ke cipersayîşê Gulistan Dokuye de ca girewto û demê cipersayîşî de di çîyê normal nêbîyê bala ci antê û wina vano: "Di çî est ê ke mi rê normal nêbî û ez wazena ke înan şima dir pare bikerî. Yê verêne, keyeyê Gulistan Dokuye derheqê materyalanê ke binê awe ra ameyî vejîyayîş de nêameybî agahdarkerdiş û înan rê vatîbî, 'Ofîsa walîtîye proses koordîne keno. Lazim o ke şima bi tu hawayî keyeyî derheqê na mesele de agahdar nêkerê.' Ez zana ke hewteyêk, des rojî dima ra keye dîyayîşê nê materyalan de ameyî agahdarkerdiş. Bawerîya keyeyî bi cipersayîşê polîsan kêm bî. Nîno mi vîr ke kamî talîmat dayo ke keye nêro agahdarkerdiş û walîtî do no proses bidomno."
Derheqê madeyê dîyine ke ci rê normal nêbî yê de, Îsmaîl E. wina va: "Çîyê ke ez wazena şima rê vajî no madeyê dîyine ke mi rê normal nêbî; ma fotografêk kamerayê wesayîtî pir de ser o bidest kerd ke yeno bawerkerdiş fotograf yê Gulistan Dokuye yo. Ma no fotograf û raport rojêk yan di rojan de dozgerîye rê şirawit. Hema dimayê nê, no fotograf çapemenîye de ame weşanayîş û hemkarê min ê şubeyî ra ame persayîş ke no fotograf senîn çapemenîye de vejîyayo. Mi reaksîyon vera Ertugrul Arslanî (berpirsê Îsmaîl E.) da û va ke ma no vila nêkerdo."
