‘Bêrê ma pîya vengê xo berz bikerê’

  • 10:08 16 Teşrîna peyêne 2026
  • NAROJANE
AMED - Endama Heyetê Îdarekarîya Komeleya Cinîyanê Rosa Seçil Bozkuş, semedê 25ê teşrîna peyêne veng da û va: "Ma do Çatrayîrê Dinya de rayîrşîyayîşêk organîze bikerê û ma wazenê ke heme cinî tewrê bibê û piştîdayîşê ma bikerê. Bêrê ma vengê xo berz bikerê û bîyayîşê xo rayîrşîyayîş de nîşan bidê, û ma vajê 'Ma tîya yê'."
 
25ê teşrîna peyêne, Roja Têkoşînê Hemverê Şîdetê Cinîyan Ser nêzdî beno, la şîdet û qetilkerdişê cinîyan ser o dewam keno. Her ke hêrîşê cinîyan her wareyê cuye de zêde benê, têkoşînê semedê azadîya cinîyan zî bi nêzdîbîyayîşê 25ê teşrîna peyêne ra hîna zêde bena. Emser, 25ê teşrîna peyêne hetê cinîyan ra bi sloganê "Bi hêzê xo û îradeyê azad, nika demê cinîyan o" yeno pêşwazîkerdiş û çalakî yenê organîzekerdiş. Endama Heyetê Îdarekarîya Komeleya Cinîyanê Rosa Seçil Bozkuş hêriş û xebata ke kenê ser o qisey kerd.
 
'Ma na cuye nêwazenê'
 
Seçil Bozkuş dîyar kerd ke sebebê zêdebîyayîşê hûmara cinîyan ya her roje, hişmendîya serdestîyê mêrdan ê hukmatî û edaletî yo û va: "No yew şewe de nêbi; rewşêk ke bi serran dewam keno. Hişmendîyêk serdestîyê mêrdan est o û wazenê bîyayîşê xo bi qetilkerdişê cinîyan bidomnê. Hukmat nêwazeno ke cinî çimanê xo akero, bixebitîyo, xoserbîyayîşê ekonomîkî bidest bikerê. Hişmendîya serdestîyê mêrdan wazeno sîstem bi rayîra serdestîye bîciwîyo. Çimkî eke cinî binê serdestîye de nêbê, eke ê bieşkê fikranê xo bi azadî îfade bikerê, do cimatêk azadêr vejîyo orte. Cinîyanê ke cayanê xebate de xebate kenê zî mobbingî dir rî bi rî manenê, tutî dibistanan de perwerdeyê şaşî gênê û bi nê hawayî sîstemê hukmatî yeno eşkerakerdiş. Ê no wazenê, la ma no cuye nêwazenê. Heto bîn de, mêrdey bînî mîsal gênê wexto ke vînenê ke yê bînî nêyenê cezakerdiş û fikrê ke dewlete ceza nêdana yeno meydan. Mêrdey dadgehe û edaletî ra cesaret gênê."
 
'Cinî do destanê xo bidê yewbînan'
 
Seçil Bozkuş ard vîr ke serewedaritîşê Wayanê Mirabele serkêşîya 25ê teşrîna peyêne ardo û dîyar kerd ke 25ê teşrîna peyêne yadkerdiş, beno sebebê xoverdayîşî. Seçil Bozkuş va: "Ma semedê 25ê teşrîna peyêne bi şîarê 'Bi hêzê xo û îradeyê azad, nika demê cinîyan o' kampanyayêk dest pêkerd. Ma wazenê her wareyî de amade bê, têkoşînê Wayanê Mîrabale bidomnê. Bêrê ma nê têkoşînî her cinî rê her cayî de, her taxî de nîşan bidê. Ma kampanyaya xo ya 25ê teşrîna peyêne Mêrdîn û Sêwreg de dest pêkerd. Dewaya tecawizî ya Sêwregî de, avûkatî persa, 'Eke tecawiz to ser o bîyo, çira to xo nêkişt?' Ma kampanyaya xo Sêwregî de hemverê nê fehmî dest pêkerd. Ma kampanyaya xo ya nê peynî Amed de zî dest pêkerd. Sey beşêk xebata xo, ma panelan organîze kenê, taxêk ra heta taxa bîne, keyeyêk heta her keyeyêk şinê. Rojê bêro de, ma do cadeyê Gazîyî de mil bi mil cinîyan dir çemberêk virazê û hewl bidê ke vengê xo bidê eşnawitiş. Lazim o ke cinî hêzê xo ra haydar bibê û vajê 'Ez wazena şima dir têbigêrî.' Lazim o ke ma hêzê xo nas bikerê. Lazim o ke ma vajê ke nika demê ma cinîyan o. Lazim o ke cinî xo, nasnameyê xo nas bikerê û xo ver bidê."
 
'Bêrê ma vengê xo berz bikerê'
 
Peynîye de, Seçil Bozkuş wina va: "Mêrdeyî wazenê ke cinî keye de bimanê, nêxebitê û bi meaşê xo serdestîya xo bipawê. Ma wazenê ke keda cinîyan bêro naskerdiş, ê keyeyî de nêrê sînorkerdiş, heqê înan têduşt bibo û têduştîya cinsîyetî bêro bidestkerdiş. Ma wazenê ke vengê ma bireso her cinî rê, ta ke tu cinî bêveng nêmano. Ma do 25ê teşrîna peyêne de Çatrayîrê Dinya de rayîrşîyayîşêk organîze bikerê û ma wazenê ke heme cinî tewrê bibê û piştîdayîşê ma bikerê. Bêrê ma vengê xo berz bikerê û bîyayîşê xo bi rayîrşîyayîşî nîşan bidê û vajê ma tîya yê!"