MERKEZÊ XABERAN – Era Purnama Sari, avûkate û pawitoxa heqanê merdiman a Endonezya ke paştî dabî kampanyaya “Azadî Abdullah Ocalanî rê, çareserîya sîyasî meselaya kurdan rê”, serra xo ya 39ine de dinyaya xo bedelnaye.

 

Era Purnama Sari, ke Endonezya de bi têkoşînê xo yê semedê heqanê cinîyan û heqanê merdiman amebî şinasnayene, seba nêweşîya kanserî ke demêk derg bi vera ci têkoşîn kerdêne, wefat kerd. Cenazeya aye 11ê teşrîna peyêne de dewa xo ya Sumatraya Rojhelatî de ameye definkerdene.

 

Bi têkoşînê xo yê semedê heqanê cinîyan ameyîne şinasnayene

 

Era Purnama Sari bajarê Jambi ya Endonezyay de semedê qebûlkerdişê pêşnûmeyê qanûnî verba tedayê cinsî kampanyaya cîyayî domna. A bi xebate û têkoşînê xo yê wareyê heqanê cinîyan û heqanê merdiman de amebî şinasnayene. Seba cesaret û qerardarîya xo ya pawitişê heqanê merdiman de, serra 2021ine de Yewbîyayîşê Rojnamegeran ê Xoser (AJI) Xelata Trimurti girewte.

 

Verba tecrîdê Abdullah Ocalanî de vejîyabî

 

Era Purnama Sari piştdayîş dabî têkoşînê azadîye yê şarê kurdî û kampanyaya “Azadî Abdullah Ocalanî rê, çareserîya siyasî meseleya kurdan rê” de ca girewtibî. Aye roportajêk de tecrîdê serê Abdullah Ocalanî sey “sucêk pîl ê verba merdimayî” biname kerdibî. Sewbîna veng da Komîteya Ewropa ya Verba Pêroyî Îşkenceyî (CPT) ke berpirsîyaranê xo bica bîyaro û verba tecrîdê Abdullah Ocalanî de bêveng nêmende.