Neslîhan Kardaş

 

ŞIRNEX - Dayîkanê Aştîye yê ke bi sloganê "semedê aştîye game bierze" 1ê teşrîna peyêne şîyî Anqara, wina vatî: Nika û tepîya semedê aştîye çi lazim bo ma do bikerê."

 

Dayîkanê Aştîye bi armancê ke azadîya fîzîkî ya Rayberê Şarê Kurdî Abdullah Ocalan pê bêro, tepişteyî sîyasî bêrê veradayîş û çarçeweya prosesê Aştî û Cimatê Demokratîkî de gamê somutî bêrê eştiş, bi sloganê "semedê aştîye game bierze" 1ê teşrîna peyêne de 24 bajaran ra şîyî Anqara. 300î ra zêdeyêr Dayîkanê Aştîye 2ê teşrîna peyêne de Parkê Kurtuluşî de nobete girewtî û 3ê teşrîna peyêne de heyetêk partîyê sîyasî ziyaret kerd. Heyeto ke Dayîkanê Aştîye pê ameyîne, meclîs de Yenî Partî, Yenî Yol, CHP, MHP û AKPyî dir pêvînayîş kerd. Sewbîna, Wezîrê Edaletî Akin Gurlek dir zî pêvînayîş kerdî. Ancî 4ê teşrîna peyêne de heyetêk Dayîkanê Aştîye serekê meclîsî Numan Kurtulmuş dir meclîsî de pêvînayîş kerd.

 

Dayîkanê Aştîye yê ke Cizîrê Şirnexî ra şîyî Anqara ajansê ma rê qisey kerdî.

 

'Ma şîyayîşê Anqarayî semedê prosesî pozîtîf dî'

 

Dayîka Aştîye Şîrîn Demîr va ke semedê ke proses serkewo şîyî Anqara û wina va: "Çar aşmî dima proses di serrê xo temam keno. La pêwa nê dewlete hema game nêerzena. Her çî meclîs ra vejîyeno. Ma şîyayîşê xo yê nê prosesî pozîtîf dî. Ma uca rind pêşwazî kerd. Ma uca nobete girewt. Ma bîyî grubê cîyayî. Beşêk şîyî meclîs, beşêk şî partîyanê sîyasî dir pêvînayîş kerd. Ez grubê meclîsî de bîya. Heme dayîkanê ke şîyî uca dej antibî. Pêwa nê semedê aştîye kewtî rayîr. Tutê ma têkoşînêk bi rûmet domnayî û lazim o wina bidomîyo."

 

'Lazim o sere de tepişteyê nêweşî bêrê veradayîş'

 

Şîrîn Demîr dewamê qiseykerdişê xo de va ke lazim o Rayberê Şarê Kurdî Abdullah Ocalan û heme tepişteyî azad bibê û wina va: "Lazim o verê tepişteyê nêweşî bêrê veradayîş. Lazim o cenazeyî zîndanan ra nêvejê. Nika û tepîya semedê aştîye çi destê ma ra bêro ma do bikerê. Wa êdî gonî nêrijîyo, zereyê dayîkan nêveşo. Sey ke ma semedê aştîye şîyî uca ma waşt ke dayîkê leşkeran û polîsan zî bêrê uca. Barê aştîye tena ser milê ma de nîyo. Lazim o ke semedê vindarnayîşê gonî gamî bêrê eştiş. Serekê ma azad nêbo ma zî azad nîyê."

 

'Ganî zîndanan ra cenaze nêvejê'

 

Sabriye Erdogan zî qisey kerd û dîyar kerd ke Rayberê Şarê Kurdî Abdullah Ocalan di serrî yo semedê aştîye têkoşîn keno û wina va: "Tirkîya hema game nêerzena. Ma bi waştişê aştîye şîyî Anqara. Wa kes nêmiro, wa zîndanan ra cenazeyî nêvejê. Wa aştî bêro. Ma nasname û heqanê xo wazenê. Wa tutê kesî nêmirê. Ma semedê edaletî şîyî Anqara de ma nobete girewt. Ma şîyî meclîs, ma partîyê sîyasîyan dir pêvînayîş kerd. Pêvînayîşî pozîtîf vîyartî. Wa êdî gonî nêrijîyo û kes nebermo."

 

'Semedê aştîye ma do her çî bikerê'

 

Mevlude Gungen zî dîyar kerd ke semedê aştîye her cayî ra dayîkê Aştîye şîyî Anqara û wina va: "Ma nobete girewt. Hawa rind nîbî, varan estbî. Pêwa nê semedê aştîye ma nê varanî de nobete girewt. Waştişê ma aştî yo. Ganî êdî ma gamê somutî bivînê. Ganî ma destveng nêmanê. Ma venga dayîkê leşkeran û polîsan danê. Wa her kes tewrê prosesê aştîye bibo. Ma zî nasname û ziwanê xo wazenê. Çi ke bikewo ser milê ma semedê aştîye ma amade yê."

 

'Wa semedê aştîye bêrê têhet'

 

Hatîce Baytur zî no ercnayîş kerd: "Ma heme şer de cuya xo vîndî kerd. Zereyê dayîkan zaf veşq. Pêwa nê dejan ma Anqara rê rayîrşîyayîş kerd. Ma semedê aştîye şîyî uca. Wa êdî tu kes nêmiro, wa gonî nêrijîyo. Ma nobete girewt, pêvînayîş kerd. Pêvînayîşî rind bîyî, muhîm bîyî. Ma wazenê aştî bêro welat. Wa semedê aştîye her kes bêro têhet."