Melîke Aydin

 

STENBOL - Avûkata Buroyê Huqûqî yê Asrînî Suzan Akîpa dîyar kerd ke vurnayîşê cayê Abdullah Ocalanî statuyê huqûqî nêvurneno û hema zî Îmralî de sey tepiştîyêk yeno girewtiş. Suzan Akîpa ard ziwan ke ê Komîteya Wezîranê Şûraya Ewropayî ra derheqê Tirkîya de qerarê xurtî wazenê û rexneyê ke hema komîsyonê taqîbkerdişê meclîsî nêame awankerdiş zî kerd.

 

Rayberê Şarê Kurdî Abdullah Ocalan Girawa Îmraliyî de derbazê cayêk newe bî, la dimayê nê statuyê huqûqî de tu vurnayîş nêame kerdiş, hema rojnameger, akademîsyen, sîyasetmedar û çalakîkerî nêşenê pêvînayîş bikerê.

 

Avûkata Buroyê Huqûqî yê Asrînî Suzan Akîpa dîyar kerd ke vurnayîşê cayî manaya vurnayîşê statuyî nêdano û va ke Abdullah Ocalan ke muxatab o, lazim o binê namey koordînasyonê aştî û sîyasetbîyayîşî de bi hawayêk azad faalîyetanê xo bidomno. Suzan Akîpa bale ant qerarê Gurbanî û qerarê bînanê DHMEyî û dîyar kerd ke hema Komîsyonê Taqîbkerdişê Meclîsî yê ke qanûnê çarçewa pêşkêş keno nêame awankerdiş.

 

'Tecrîd dewam keno, statuyê huqûqî de vurnayîş çin o'

 

Suzan Akîpa dîyar kerd ke Îmraliyî de vurnayîşê cayê Abdullah Ocalanî statuyê huqûqî nêvurnayo û va: "Cayê newe awanîya girêdayeyê zîndanî yo. Abdullah Ocalan muxatab o û hetê dewlete ra muxatab yeno girewtiş. Lazim o ke no rol bikewo binê asayîşê huqûqî. Statuyê Abdullah Ocalanî hema rewşa verêne ya. Sey tepiştîyêk yeno girewtiş. Lazim o ke binê koordînasyonê sîyasî û aştîye de bi hawayêk fermî statuyê ey bêro dayîş."

 

'13 serrî yo hemverê heqê hêvîye yeno girewtiş'

 

Suzan Akîpa ard ziwan ke Tirkîya derheqê nêcaardişê qerarê DHMEyî de sîcîlêk cidî rê wayîr a û wina dewam kerd: "Heqê hêvîye semedê kesêk ke cezaya heta hetayî ci ser o biryayo îmkanê azadîye pêşkêş keno. Pêwa ke qerarê binpaykerdişê serê nê heqî de 13 serrî vîyart, hema Tirkîya tu game nêeşta. Abdullah Ocalan 28 serrî yo tepişte yo. Semedê kesêk ke cezaya heta hetayî ci ser o biryayo tewr zaf 25 serrî dima ra îmkanê azadîye yeno dîyayîş. Pêwa ke Abdullah Ocalan 28 serrî yo tepişte yo, Tirkîya meseleya heqê hêvîye de tu çî nêkerd. Vurnayîşê qanûnî yê derheqê heqê hêvîye de semedê serkerdişê prosesî ferz o. Heqê hêvîye ferzê huqûqî yo û nêşeno bibo babeta bazarê sîyasî."

 

'Lazim o ke Komîteya Wezîran hîna zêde bi qerardarî bibo'

 

Suzan Akîpa dîyar kerd ke lazim o Komîteya Wezîranê Şûraya Ewropayî hemverê Tirkîya de helwestêk hîna cidî û bi qerardarî têbigêro û pabebîyayîşê xo yê kombîyayîşê 1-3ê kanûne pare kerd: "Lazim o tespît bibo ke Tirkîya heqê hêvîye de tu game nêeşta. Lazim o Komîteya Wezîranê Şûraya Ewropayî meseleya heqê hêvîye de hîna zêde bi qerardarî û cesûr bibo. Pabebîyayîşê ma yê kombîyayîşê 1-3ê kanûne no yo ke tespît bikero ke Abdullah Ocalan 28 serrî yo tepişte yo û 13 serrî yo hemverê heqê hêvîye yeno girewtiş."

 

'Lazim o ke Komîsyon proses bikero zemînê sivîlî'

 

Suzan Akîpa va ke Komîsyonê Taqîbkerdişê Meclîsî ke lazim bî bi madeyê 7ine yê Qanûnê Çarçewa bêro awankerdiş, hema nêame awankerdiş û va: "No taloqkerdiş prosesî peynî keno. No hîrê aşmî yo. Dimayê ke rojnameyê fermî de ame weşanayîş lazim bî bêro awankerdiş. La hema nêame awankerdiş. Lazim o ke prosesî rê bibo zemînê legal, sîyasî û sivîlî; hetê kurdî, tirkî û dewlete taqîb bikero, pêşnîyazê sîyasî û huqûqî bikero. Komîsyon hetê komelbîyayîşê prosesî de muhîm o. Lazim o ke komîsyon eynî wextî de têduştîya cinsîyetî û zafîya sîyasî esas bigîro."