AMED - Hetê Mudirîya ya Polîtîkayanê Cinîyan a Şaredarîya Yenîşehrî ra, çarçewaya çalakîyanê 25ê Teşrîna Peyêne Roja Têkoşînê Şîdetî yê Vera Cinîyan de bi şîarê “Bi Hêzê Xo û Îradeyê Azadî Nika Wextê Cinîyan o” Dewa Cimikanî (Çakmak) de Atolyeya Jîneolojî ameye viraştiş.

 

Endamê meclîsî yê cinî yê şaredarî, îdarekarê cinî yê Rêxistina Qeza ya Yenîşehîrî ya DBP'yî, Hemsereka Qeza ya Yenîşehîrî ya DEM Partî Berîvane Beyazadam, temsîlkarê rêxistinanê cinîyan û zaf cinî beşdarê atolye bîyî.

 

Atolye de problemê ke cinî cuya komelkî de rastê ci yenê, şûurê cinîyan û muhîmîya hêzê xo û îradeyê azadî ser o erjnayîşî ameyî kerdiş. Pêdîyayîşî de ke cinîyan tecrubeyê xo pare kerdî, bale ancîyaye têkoşînê hemparî yê vera şîdetê cinîyan û xurtkerdişê piştîpêdayîşê cinîyan ser o.