ÎZMÎR - Diyîn roniştişê dewaya rojnamegere Melîke Aydin, Tolga Guney, Delal Akyuz û Semra Turan ke bi îdayê “endamîya rêxistine” yenê muhakemekerdiş, ame vînayîş. Semra Turan semedê nêbîyayîşê delîlan beraat kerd, rûniştişê 3 rojnamegerê bînî zî ame taloqkerdiş.

 

Roniştişê diyîn ê dewaya mûxabîra ma Melîke Aydin û mûxabîrê Ajansê Mezopotamyaye (MA) Tolga Guney, Delal Akyuz û Semra Turan ke ci ra ameyîne muhakemekerdiş 13ine Dadgeha Cezaya Giran ya Bayrakliyê Îzmîrî de ame kerdiş. Rojnamegerî û avûkatî tewrê roniştişî bî, MLSA û xeylêk endamê çapemenîye zî roniştiş taqîb kerdî.

 

Semra Turan beraat kerd

 

Rûniştişê dewa bi tespîtkerdişê nasnameyan dest pêkerd. Heyetê dadgehe ewilî dosyaya Semra Turan ercna. Semra Turan semedê nêbîyayîşê delîlan beraat kerd.

 

Semedê Melîke Aydin waştişê ceza 

 

Dima ra roniştişê Melîke Aydin dest pêkerd. Vernê de şahida eşkere Buse Aslan amî goşdarîkerdiş. Dima ra îfadeyê Buse Aslane, dozgerî waşt ke Melîke Aydin bi îdayê "endamîya rêxistine" bêro cezakerdiş. Melîke Aydin û avûkatê aye îdîa red kerd û semedê pawitişî dem ame waştiş. Roniştiş taloqê 18ê Temmuze saete 09.20ine ame kerdiş.