MERKEZÊ XEBERAN - PKK’yî neql kerd ke kongreya xo ya 12. dîyarê endamê awankerdox Alî Haydar Kaytan û Riza Altun kerdê.

 

Dimayê "Vengdayîşê Aştî û Komelê Demokratîkî" ke 27ê Sibate de hetê Rayberê Şarê Kurdî Abdullah Ocalanî ra ame kerdiş, PKK'yî netîcenameyê  Kongreya xo ya 12. eşkera kerd. Netîcename ame dîyarkerdiş ke PKK'yî 12. Kongreya xo mabêne 5-7ê Gulane de organîze kerdo û wina ame vatiş, "Ma 12. Kongreya xo ya tarîxî dîyarî nê her di hemrayanê xo yê şehîdî ke destpêk de mîyanê Têgêrayîşê ma yê Azadîye de ca girewtê û heta ewro bi têkoşînê xo yê bêmabêne pêşengî kerdê, kenê."

 

Yadkerdiş do bêro organîzekerdiş

 

Ame dîyarkerdiş ke semedê Alî Haydar Kaytan û Riza Altunî yê ke dinyaya xo bedelnayî do xeylêk cayan de yadkerdişî bêrê organîzekerdiş. Goreyê bernameyê ke ameyê neqlkerdiş:

 

*13-14-15ê gulane de do Anqara de yadkerdişêk bêro organîzekerdiş. 

 

*17ê gulane de Dêrsim de verê abîdeyê Seyît Rizayî de do yadkerdiş bêro organîzekerdiş.

 

*18ê gulane de Amed de Meydanê Şêx Seîdî de do yadkerdişêk girseyî bêro organîzekerdiş.

 

Heto bîn ra ame neqlkerdiş ke do mabêne 13 û 18ê gulane de xeylêk bajaran de yadkerdişî bêrê organîzekerdiş. Yeno pawitiş ke keyeyê her di şorişgiran zî beşdarê bernameyê yadkerdişî bibê.