Rozerîn Gultekîn 

 

STENBOL - Endamê SESî derheqê ‘Çeteyê yenîdogan' ke pitikan qetil kerdê de ercnayîş kerd û dîyar kerd ke na netîceya polîtîkaya ‘vurnayîşê weşîye’ ya û vat ganî bê karî ganî xizmetê weşîye bêro averşîyayîş. 

 

Stenbol de vejîya werte ke 'çeteyê yenîdogan' semedê zêdeyêr pere Sazgehê Asayîşê Komelî (SGK) bigîrê, pitikan beşa giran de dayî vindarnayîş û qetil kerdê. 'Çeteyê yenîdogan' ra 47 kesî ameyî destbendkerdiş, 22 kesî ameyî tepiştiş. Îdianameyê derheqê çeteyan de ame amadekerdiş de ame vatiş ke şikdaran, pitikan nêweşxane de dayê vindarnayîş û bi metodê dermankerdişî yê nê rastî de bîyê sebebê mergê pitikan. 

 

Endamê Sendîkaya Kedkarê Weşîye (SES) derheqê babete de ercnayîş kerdî.

 

Hemsereka SESî ya Şîşlî Fadîme Kavak Sevîm wina vat: “Sîstemêk bi qasê pereyê to, weşîya est a. Semedê qezenckerdişê pereyî, çeteyê yenî dogan awan bîyo. Çete pozîsyonêk ke îqtîdar ra xoser faliyetan bikero nîyo. Semedo ke organîzasyonêk pîl ameyo awankerdiş. 2-3 kesî nêeşkenê nê bikerê. Beşêk îdarekarê nîyê û nêvînaye yenê. Gerrekerdiş bîyo nê ser de vejîyayo werte. Vanê ma taqîb kenê la wexto ke şikî dîyê, peynî biardêne. Prosesê ke vatê ma taqîb kenê, mergî virazîyayê. Ganî xizmetêk weşîye yê karî ci de çin o bêro averşîyayîş.”

 

‘Pûçbîyayîşê komelî tesîr her cayî rê keno’

 

Endama îdarekarîya merkezî ya SESî Nursel Yucesoy zî wina vat: “Semedo ke pereyê beşê giran SGK danê, çete awan benê û nê wareyan kenê wareyê rantî. Sazgehê îstîmlakî padanê, nêweşxaneyê bajarî de rant kenê û xizmetê weşîye werte ra wedarnenê. Semedê nê zî şar şino nêweşxaneyê taybetî. Şar mecbûr maneno ke şêro nêweşxaneyê taybetî. Kontrolkerdişê nêweşxaneyan biameyîne kerdiş, do no problem rew bivejîyayîne werte. Pûçbîyayîşê komelî tesîr her cayî rê kerdo. Ma semedê xizmetê weşîye yê bêpere, bi ziwanê dayike têkoşîn bikerê.”

 

Sekretera Cinîyan ê şubeyê Anatolya ya SESî Sevgî Mersîn zî wina vat: “Hemverê nê de veng ameyo berzkerdiş la cewabê nê vengî nêameyo dayîş. 2016ine de wexto ke şuxilyayîne, hende pirr nêbî. La dimayê ke bi sîstemê performansî dîyar bî, tîya bî pirr. Nê dir caardişê bêmerdimayî zî vejîyayî.”