Melek Avci

 

ANQARA - Hemsereka pêroyî ya SYKPî Feray Mertoglu da zanayîş ke dimayê qiseykerdişê Devlet Bahçelî persê ‘çareserî est o yan çin o’ ameyo rojeve û venga baldarbîyayîşî kerd: “Ma nêzdîbîyayîşê têgêrayîşê azadîya kurdan muhîm vînenê û taqîb kenê. Ma zanê ke zîhnîyetê Osmanî ameyo dewr girewtiş û hişmendîyê tarîxê sîyasî nê kayan do kay bikerê.”

 

Serekê pêroyî yê MHPyî Devlet Bahçelî kombîyayîşê koma xo de tecrîdê Rayberê PKKyî Abdullah Ocalanî ser o qebûl kerdibî û semedê heqê hêvîye zî şertê ‘tasfiyekerdişê rêxistine’ dabî vernî. Badê serekê pêroyî yê CHPyî Ozgul Ozerl qisey kerd û vatişê ‘Ez kurdan rê pêşnîyazîya wayîrvejîyayîşê dewleta tirkan kena’ şuxilnabî. DEM Partîye zî hemverê nê de reyke bîn ard vîr ke muxatabê çareserî Îmrali yo.

  

Hemsereka pêroyî ya Partîya Xelisyayîşê Neweyî Sosyalîstî (SYKP) Feraya Mertoglu ercnayîş kerd.

 

‘Bahçelî rê çareserî nîno pawitiş’

 

Feraye wina qal kerd: “Tecrîd dewam keno. Tu sebebê ci çin o ke hewldayîşê MHPyî ra ma hêvî bigîrê. Nê hewldayîşê Bahçelî de miskalê demokrasî çin o. Bêşik ma wazenê tecrîdê Abdullah Ocalanî ser o bêro wedaritiş. Ma tecrîd qebûl nêkenê. Dafike tîya de; krîzêk giran ê ekonomî est o. Tirkîya wazena hewldayîşê qirkerdişê ke Îsraîlî hemverê Fîlîstînî dayo destpêkerdiş de nêzelalîya Rojhelatê Mîyanên de rolê xo kay bikero û belkî zî semedê amadekerdişê zemînê hêrîşê hemverê Rojawanî nê kena. Bahçelî pawemendişê çareserî mumkin nîyo.”

 

‘Merdimî nêeşkenê qalê prosesêk demokratîk bikerê’

 

Feraye dewam de bale ant rewşa tepişteyan ser û vat: “Semedo ke çareserî bêro vînayîş, ganî ma zîndanan ra biewnê. Amancê înan o yo ke vernîya  Rojawano ke hetê dinya ra yeno naskerdiş, padê. Îdarekarî HDP-DEM partî tepişteyê, surgun de yê. Şertê ke meseleya kurdî bi hawayêkê azad nêro qiseykerdiş de merdim nêeşkeno qalê prosesêk demokratîk bikero.”

 

‘Wa şerê muzakereyî bêrê awankerdiş’

 

Feraye tewr peyîn wina vat: “Pêvînayîşê lîderê CHPyî yê bi Selahattîn Demîrtaşî û serdayîşê bajarê kurdan muhîm o. Ma sey SYKPyî çareserîyê meselaya kurdan ê demokratîke û aştîyane pawit. Ma nêzdîbîyayîşê têgêrayîşê azadîya kurdan muhîm vînenê û taqîb kenê. Ma zanê ke zîhnîyetê Osmanî ameyo dewrgirewtiş û hişmendîyê tarîxê sîyasî de nê kayan do kay bikerê. Waştişê ma o yo ke şert û mercê muzakereyî bêrê awankerdiş. Semedê ma çîyo esas wedaritişê tecrîdî yo. Ganî berê çareserîya aştîyane bêrê akerdiş.”