Memihan Zeydan-Neslihan Kardaş

 

WAN- Cinîyan dîyar kerd ke ê merdimayîye xo ra şerm kenê û reaksîyon hemverê mergê şikin yê Rojîn Kabaîşe mojnayî. Cinîyan dîyar kerd ke ê xo asayîş de hîs nêkenê û hemverê nê hedîseyan de ganî bêveng nêmanê û ganî semedê şikdaran cezayê lazimî bêrê dayîş.

 

Cinîyê Wanî derheqê mergê bi şik yê Rojîne de qisey kerdî.

 

‘Unîversîte de desteştiş ma rê ame kerdiş ma ameyî bêvengkerdiş’

 

Wendekara unîversîteya Yuzuncu Yilî Arya Yîgît wina vat: “Rojîne ê ewilî nîya. Verê zî hedîseyê tacîzî ameyî ciwîyayîş. La ma ameyî bêvengkerdiş. Coka hedîse pîl nêbî. La ewro ma Rojîne dir vengê xo berz kerd. Ma bêveng nêmendî. Ne kampus de ne zî bajar de. Ma xeylêk xemgîn û endîşeyîn ê. Do hemverê nê de hêrsê ma peynî nêbo.”

 

‘Ez hewl dana ke vengê xo berz bikerî’

 

Esra Goktekîn ke hevala Rojînê ya unîversîte ya, wina vat: “Îmkan çênibî Rojîne nas bikerî. La vînîbîyayîşê aye ra zaf tesîr bîya. Nika ez hewl dana ke semedê waya xo vengê xo berz bikerî. Ganî problemê kampusî lezkî bêrê çareserkerdiş. Ma rehet nêeşkenê vejîyê teber. Rojîne zî nêvejîyaya. Ez zaf xemgîn a. Werrekna wina nêbîne û rew agahî bidayîne keye. Cinîyê ke hemverê nê hedîseyan de vengê xo berz kenê yenê qetilkerdiş. Ma her tim mahkumê qetilkerdişî kenê. La ma do vengê xo berz bikerê û bêveng nêmanê.”

 

‘Ma merdimayîya xo ra şerm kenê’

 

Naîde Çobanli zî wina vat: “Beno ke aye kênaya ma hemîne bibayîne. Hêvîya ma o yo ke berpirsîyarî lezkî bêrê vînayîş. Cinîyêke ciwane çira întîxar bikero? Eke nîyetêk aye winasî bibayîne do nêameyîne wendiş. Ma tersenê vejîyê kuçeyan. Kênayê mi zî teber de wanenê. Ma tersenê. Hêvî kena edalet ca bêro.”

 

Gulser Tucer zî derheqê babete de wina vat: “Semedê nê çi destê ma ra bêro, ma do bikerê. Wa ciwanan rê çîyêk nêbo. Goreyê mi dosyaya Rojîne, dosya cînayetî ya. A kêna întîxar nêkena. Kesêke întîxar bikero nîya. Kezeba mi veşena. Ez nêeşkena zêde çîyêk vajî.”

 

‘Semedo kênayê bînî nêmirê çi lazim bo ma do bikerê’

 

Neşe Brîsîntîn zî wina vat: “Mi rewşa Rojîne taqîb kerd. Her roje Rojîne vîrê mi de bî. Goreyê mi Rojîne ameye qetilkerdiş. No întîxar nîyo. Rojîne telefon de qisey kena û beno ke kesêk cuya aye de bîyo û semedê qerarê visnayîşî reya peyîn qisey kena. Ê pêvînayîşî de beno ke ameya qetilkerdiş. Tirkîya de xeylêk cinî yenê qetilkerdiş. Desteştişê tutanê qijan yeno kerdiş. Ma cinî koleyê camêrdan nîyê. Ma cinî yê, dayîk ê, her wareyê cuye de yê. Ganî ma cinî bêveng nêmanê û wurzê lingan ser. Wa semedê kiştoxan cezaya giran bêro dayîş.”