MÊRDÎN - Hevseroka Giştî ya DEM Partiyê Tulay Hatimogullari di şahiya 1ê Îlonê de bal bir ser pêvajoya Aştî û Civaka Demokratîk û pêwîstiya hevdîtina komîsyonê ya bi Abdullah Ocalan re anî ziman.

 

Platforma Saziyên Demokratîk, bi beşdariya Hevseroka Giştî ya DEM Partiyê Tulay Hatimogullari, bi munasebeta 1’ê Îlonê li Parka Karayollari ya Artûkliya Mêrdînê şahî li dar xist. Gelek kes tevli şahiyê bûn û dirûşmên "Bijî Serok Apo" û "Jin ji bo azadî” berz kirin.

 

Tulay Hatimogullari,  got, "Divê her kes bi ciddîyek mezin nêzî pêvajoyê bibe. Divê kes pêvajoyê bi berjewendiyên xwe ve sînordar neke. Divê aştî û Civaka Demokratîk bi hev re werin avakirin. Divê komîsyon bi lezgînî bi Birêz Ocalan re hevdîtinê bike. Divê em di vê serdemê de hîn bêtir xwe birêxistin bikin û bixebitin. Divê her kes berpirsiyariyên xwe bicîh bîne. Têkoşîna me dê berdewam bike heta ku em encamên siyasî û yasayî yên ku xwişk û biratiya hemû gelan nîşan didin bi dest bixin."

 

Girseyê bi coşek mezin li stranên ku ji hêla Hamit Karadeniz ve hatin gotin, guhdar kir. Bi dirûşm, stran û govendê şahî bi dawî bû.