RIHA - Aktîvîsta TJA’yê Ayla Akat Ata di mîtînga 1’ê Îlonê Roja Aştiyê ya Cîhanê de axivî û bal kişand ser pêvajoya ku bi pêşengiya Rêberê Gelê Kurd de hatiye destpêkirin û got, "Wekî jin, em ê bibin xebatkar, rêxistinvan û parêzvanên pêvajoyê."

 

Platforma Saziyên Demokratîk ji bo 1’ê Îlonê Roja Aştiyê ya Cîhanê  li Parka Riha Novada bi dirûşmeya "Ji bo Civaka Demokratîk Deng Bidin Aştiyê" mîtîngek li dar xist. Çalakvana Tevgera Jinên Azad (TJA) Ayla Akat Ata; Hevseroka Konfederasyona Sendîkayên Karmendên Giştî (KESK) Ayfer Koçak; Hevserokê Partiya Wekhevî û Demokrasiyê ya Gelan (DEM) Tuncer Bakirhan; parlamenterên Rihayê yên DEM Partiyê Dîlan Kunt Ayan û Omer Ocalan; Mehmet Ocalan, birayê Rêberê Gelê Kurd Abdullah Ocalan; Meclîsa Dayikên Aştiyê, endamên rêxistinên bajar û navçeyan ên Partiya Herêmên Demokratîk (DBP) û DEM Partî, rêxistinên civaka sivîl û bi deh hezaran kes beşdarî mîtîngê bûn.

 

Bi hezaran kesan dirûşmên “Bijî Serok Apo”,”Bê Serok Jiyan nabe”, “Jin jiyan azadî” berz kirin.

 

Hevseroka Bajarê Rihayê ya DEM Partiyê Ayşe Surucu di mîtîngê de axivî û diyar kir ku ew di rojên dîrokî re derbas dibin û got, "Di 27’ê Sibatê de di bin serokatiya Rêberê Gelê Kurd Abdullah Ocalan de pêvajoyek nû dest pê kir. Em ji vê pêvajoyê bi hêvî ne. Divê azadiya fîzîkî ji Birêz Ocalan re were dayîn da ku di şert û mercên rehettir de bixebite."

 

Aktîvîsta TJA’yê Ayla Akat Ata, diyar kir ku îro her kes dê dengê xwe ji bo aştiyê bilind bike û got, "Werin em hemû bi hev re dengê xwe bilind bikin û silavên xwe ji çar aliyên Kurdistan, Tirkiye, Rojhilata Navîn û cîhanê re bişînin. Her kesê ku di bin zilmê de ye wateya Roja Aştiyê dizane. Ji Rihayê heta Îmraliyê, em silavên xwe ji Rêberê Gelê Kurd Birêz Abdullah Ocalan re dişînin. Werin em bi hev re  bibêjin bijî aştî. Bila ji bo me hemûyan rojek pîroz be. Îşev, li vê meydanê, em ê hemû bibêjin aştî. Îro, 1’ê Îlonê, Roja Aştiyê ya Cîhanê li vir wateyek nû digire. Ev erdnîgarî bi hewldanên me wateyek nû dide Roja Aştiyê ya Cîhanê."

 

Mîting bi stranên Xêro Ebas gotin bi dawî bû.