WAN - Nêzîkî 150 ajokarên taksiyê yên ku ji bo piştgiriya xwepêşandana xwendekaran a ku ji bo ronîkirina mirina bi guman a Rojîn Kabaiş, diçûn kampusê, li ser fermana Rektoratê nehiştin ku ji navenda bajêr derkevin.

 

Grûpa Ajokarên Taksiyan a Navenda Wanê hewl da ku ji bo piştgiriya xwepêşandana xwendekaran a ku daxwaza ronîkirina mirina gumanbar a Rojin Kabaiş, biçe kampusê. Lê belê, bi fermana Rektoratê, nêzîkî 150 ajokarên taksiyan nehiştin ku ji navenda bajêr derkevin û ber bi kampusê ve biçin.

 

Piştî dorpêçkirinê, ajokarên taksiyan li Parka Îpek a navçeya Rêya Armûşê kom bûn û civîneke çapemeniyê li dar xistin.

 

'Ev xemsarî, barbarî û kuştin e'

 

Di daxuyaniyê de hat gotin:"Rapora ATK'ê ya ku niha derketiye holê eşkere dike ku nimûneyên DNA'yê yên du mêran cuda ne. Ev rapor salekê veşartî ma. Bavê Rojînê bi wêneyê keça xwe yê di dest de derî bi derî digeriya û edalet dixwest. Ma ev ne şerm e ji bo me hemûyan? DNA'ya du mêrên cuda li ser laşê Rojînê hate dîtin, lê dosya, delîl û rapor winda ne. Ev xemsarî, barbarî û kuştin e. Em, Koma Ajokarên Taksiyên Wanê, bang dikin: Her kesê ku mirina bi guman a Rojînê vedişêre, sûcdaran vedişêre û edaletê paşguh dike, hevkarê vî sûcî ye. Ev xemsarî, barbarî û kuştin e. "