Rengîn Azîzoglu

 

STENBOL - Hevberdevka DÎK’ê Huda Kaya, da zanîn ku di hiqûqa îslamê de cenazeyê dijmin jî divê destnedana wê heye û got: “Desthilatdariya AKP’ê ligel vê zilmê, wek desthilatdariya ku cenaze revandiye jî derbasî dîrokê bû. Ev desthilatdarî wê rojekê tune bibe û biçe.  Wê mirovahî jî bi şerm vê desthilatdariyê bi bîr bîne.”

 

Mafê definkirina cenazeyan  û mafê şîngirtinê mafê herî sereke yê mirovahiyê ye û ev gelek caran li Tirkiyeyê hatiye binpêkirin. Li Tirkiyeyê cenazeyê Sêx Saîd û hevalên wî jî piştî hatin darvekirin, hatin revandin û li cihekî nayê zanîn defin kirin.  Aqûbeta Seyîd Riza û hevalên wî jî bi heman awayî pêş ket.

 

Cenazeyên bi hezaran kesên di şerê li hemberî PKK’ê de hat meşandin de jiyana xwe ji dest dan jî ji malbatên wan hatin revandin û li gorên komî an jî yên bêkesan hatin definkirin. Di sê salên dawî de jî  bi dehan goristan hatin bombebarankirin, hilweşandin û bêyî malbatan gor hatin vekirin û cenaze revandin. Her wiha di pêvajoya qedexeyên derketina derve de jî cezaneyên gelek kesî bi rojan li erdê man û di cemedankê de hatin veşartin.

 

Herî dawî jî cenazeyê Zulkuf Gezen, Ayten Beçet, Zehra Saglam, Medya Çinar jî teslîmî malbatan nehatin kirin û nîvê şevê hatin şandin, nehiştin kes tevlî cenazeyan bibin.

 

‘Wek desthilatdariya ku cenaze revandine derbasî dîrokê bû’

 

Hevberdevka Kongreya Îslamî ya Demokratîk, Namzeta hevşadariya HDP’ê ya Bagcilar a Stenbolê Huda Kaya, bertek nîşanî rewşê da û da zanîn ku di hiqûqa îslamê de cenazeyê dijmin jî destnedana wê heye.

 

Hudayê ev tişt got: “Li qadên şer jî çi bi ser keve, cenaze ji aliyên alîgiran ve tên girtin.  Her kes li gorî baweriya xwe merasîma cenaze organîze dike. Muşrîkên Mekeyê jî dest nedan cenazeyan.  Desthilatdariya AKP’ê ligel zilma dimeşîne, cenazeyan direvîne, bi awayekî korsanvarî defin dike. AKP bi van pêkanînan derbasî dîrokê bû.  Ewil goristan bombe kirin,  perestgeh hilweşandin, cenaze bi erdê re kaş kirin, tazî teşîr kirin.  Ev êdî di sîcîla wan de bi cih bûye. Hesabên van jî wê rojekê bê pirsîn. Ev şerm, ev lekeya reş wê li rûyê wan bimîne. Mirovahî wê vê desthilatdariyê bi şermê bi bîr bîne.”