STENBOL - Li Umraniyeyê li ser daxwaza xurt a gel û bi rêya xebata komunal Zimanxane hat damezrandin. Hevseroka komeleyê Hulya Darak, bal kişand ser parastina çand, nasname û ziman û got: "Em jî bang dikin û dibêjin werin kurdî fêr bibin û fêrî zarokên xwe bikin."

 

Zimanxane, ku di 25'ê Hezîranê de li navçeya Umraniye ya Stenbolê ji ber daxwaza xurt a gel û hewldana civakî vebû. Komele armanc dike ku zimanê Kurdî ji zimanekî ku tenê di malê de ye derbas bike û wê bîne her aliyê jiyanê, ji kolanan bigire heya cîhê kar. Bi vekirina Zimanxaneyê re, ew veguheriye qadeke kolektîf.  Heta niha 120 serlêdan hatine wergirtin. Di saziyê de ku 50 zarok perwerdehiyê dibînin. Ders roja Şemiyê di 3 polên cuda de ji bo mezinan û zarokan têne dayîn. Bi tevahî 7 mamoste li Zimanxaneyê dixebitin. Ders di du rûniştinên cuda de di navbera saeta 16.00-19.00 û 19.00-22.00'an de têne dayîn.

 

Têkildarê xebatên Zimanxanê de Hevseroka Zimanxaneyê Hulya Darak ji ajansa me JINNEWS'ê re axivî. 

 

Hulya Darak diyar kir ku li Stenbolê perwerdehiya bi zimanê Kurdî kêm e û daxwazek mezin ji raya giştî di vî warî de heye û got ku zarok dixwazin bi zimanê xwe yê dayikê biaxivin. Hulya Darak, diyar kir ku wan Zimanxane ji ber eleqeya zêde ya raya giştî vekiriye û tekez kir ku ev sazî berhema xebata komunal e. Wê ragihand ku niha 120 serlêdan, 50 xwendekarên zarok û sê pol (du ji bo mezinan û yek ji bo zarokan) li cem wan hene. Wê destnîşan kir ku ders heftê carekê, roja Şemiyê, têne dayîn û heft mamosteyên wan hene û wiha dirêjî da axaftina xwe: "Dersên me ji saet 16.00'an heta 19.00 û ji 19.00'an heta 22.00'an didomin. Zarok tên vir hem ji bo ku bi zimanê xwe yê dayikê biaxivin û hem jî demek xweş derbas bikin. Di pêşerojê de, em ê ji bo zarokan Şanovanek jî ava bikin. Ev cih bi keda her kesî hatiye damezrandin. Zimanxane mala gel e. Em dixwazin her kes were vir. Divê her kes li mala xwe xwedî derkeve. Me ew bi coşeke mezin vekir û ew coş berdewam dike. Gelê me xwedî li saziya xwe derdikeve. Gel bi rastî dixwaze bi zimanê xwe yê dayikê biaxive."

 

'Em dixwazin Kurdî bînin her aliyê jiyanê'

 

Hulya Darak diyar kir ku Kurdî bi saya jin û dayikan nehatiye jibîrkirin û tekez kir ku dayikan ev kevneşopî heta roja îro bi stranên Kurdî û sohbetên rojane berdewam kirine. Hulya Darak diyar kir ku zarok dema diçin dibistanê zimanê xwe ji bîr dikin û got ku ew dixwazin zarok werin Zimanxaneyê da ku bi zimanê xwe yê dayikê biaxivin û ji bîr nekin. Hulya Darak diyar kir ku divê ziman neyê jibîrkirin û her kes ji heft salî heta heftê salî dikare were vir û wiha bi lêv kir: "Divê ziman neyê jibîrkirin. Her kes ji heft salî heta heftê salî dikare were vir. Dersên me pir baş diçin. Em dixwazin zimanê Kurdî bînin her aliyê jiyanê, ne tenê li malên xwe. Em dixwazin li dibistanan, li kolanan, li cihên kar, li her derê bi wê biaxivin."

 

'Fêr bibibin fêr bikin'

 

Hulya Darak diyar kir ku polîtîkayên asîmîlasyonê yên li dijî zimanê Kurdî ji demên berê heta niha berdewam kirine û got ku di demên berê de ji bo ku zarok li dibistanan bi Kurdî neaxivin tundî hatiye bikar anîn û ziman hatiye qedexekirin. Hulya Darak, tekez kir ku hewl hene ku bi rêya zilmê zimanê Kurdî ji holê were rakirin û diyar kir ku ew ê şer bikin û her tiştê ku ji destê wan tê bikin da ku zimanê Kurdî neyê jibîrkirin, çi dibe bila bibe. Hulya Darak, bi diyarkirina pabendbûna xwe ya ji bo fêrbûn û hînkirina Kurdî, ev tişt parve kir: "Me Zimanxane vekir û ji niha û pê ve em ê hîn bêtir saziyên zimanê Kurdî vekin. Divê her Kurd çand, nasname û zimanê xwe biparêze. Her kesê ku dixwaze were Zimanxaneyê dikare were. Malbat bi zarokên xwe re tên dersan. Divê gelê Kurd serî li Zimanxaneyê bide û piştgiriyê bide wê. Bi taybetî jin divê werin û Kurdî fêr bibin û fêrî zarokên xwe bikin. Werin em Kurdî fêr bibin û bi Kurdî biaxivin."