WAN - Fedîye Sari ya dewa Atêse ya Elbaqî de ciwîyena, baxçeyê xo fêkî ra bigî heta sebze her çîyê xo çînena û va: “Ez herre dir baş a. Demo ke dest dana herre xo baş hîs kena. Ez dewe de baş a, aramî est a. Herre hêz û aramî dana mi.”

 

Fedîye Sari ya 55 serrî ya dewa Atêsî ya Elbaqî aîya Wanî de ciwîyena, dimayê cuya bi serran ê bajarî, verê xo dana dewe û baxçeyê xo de sebze û fêkîyê xo çînena. Fedîye Sari Edene de pîl bîya la dimayê ke zewicyena dewe de ca bena û va: “Ez dewe ra nêvisyaya. Baxçeyê mi est o. Ez her çîyê xo bi zerrî heskerdiş resnena. Ci dir eleqedar bena. Ez çi bivînî çînena. Ez bi herre keyfweş, aram û xurt a.”

 

Her tewir sebze û fêkîyan

 

Fedîye Sari wina va: “Ez tena baxçeyê xo ewnîyena. Firingî, bacan, îsot, bamya, bezelye, xiyar, pîyaz, bexdenûz, firîngî, tivir û zîr. Her çî çînena. Ez berardişê xo ra qezenc nêkena. Ez dana kesê ke hewcedarî est a. Kam biwazo ez dana. Demo ke meymanêk bêro ez dana. Dana cîranan. Ez şêrî cayêk bena. La bazirganiyê ci nêkena. 32 serrî yo karê xo yê baxçeyî ez kena. Aşma adare de ma dest bi baxçe kenê. Ma aşma nîsane de çînenê. Heta temmuze û tebaxe resenê. Darê min ê sayan, mişmiş, gêlyaz zî est ê. Engure est a.”

 

‘Ez herrî ra hêz gêna’

 

Fediye Sari tewr peyîn wina va: “Herre dir eleqedarbîyayîş mi keyfweş keno. Ez xo aram û rehet hîs kena. Ez herre ra hêz gêna. Herrî bawerî dana merdimî. Merdimî aram benê. Ez bajar de pîl bîya la êdî nêeşkena bajaran de bimanî. Ez zewicyaya ameya dewe. Ez her çî tîya musa ya. Nika zî nêeşkena dest ci ra vera bidî.”