ANQARA – Serekwekîla Grûba DEM Partî Gulîstan Kiliç Koçyîgîte da zanayene ke butçeya serra neweyî de zî tewr zaf pere pawitişî rê ameyo aqitnayene û vat: “Eke vatişî de aştî bibo ganî butçe de zî aştî bibo. Eke pêkewtişî biqedîyê ganî xercê ke çekan rê yenê aqitnayene şarî rê bêrê aqitnayene.”

 

Gulîstan Kiliç Koçyîgîte meclîs de derheqê averşîyayîşanê rojeve de eşkerayîyêk daye. Koçyîgîte verê her çîyî kesê ke Îstanbul û zaf bajaranê bînan de sebebê laseran ra cuya xo ra bîyî, ardî vîrî û vat ke ê do dima bigêrê ke mexdurîya hemwelatîyan bêra çareserkerdene.

 

Gulistan Kiliç Koçyîgîte vat ke sebebê felaketê laserî polîtîkayê îqtîdarî yê ke emnîyetê hemwelatîyan esas nêgênê û wina dewam kerd: “Eke şima vera xoza hereket bikerê felaketê winasî benê. Berpirsîyarê naye îqtîdar o ke vera xoza hereket keno û seba rantî xoza talan keno. Felaketê winasî Îstanbul de newe nîyê; verê cû zî bîbî la tu tedbîr nêameyî girewtene. Îqtîdarî herinda ke tedbîran bigîro şaristan rantî rê akerd. Îqtîdar bi no hewa do mazûbanîya COP31î bikero. Ma vera naye venga Zîrweyê Îklîmî yê Şaran danê.”

 

‘Barê bacan danê milê şarî’

 

Gulistan Kiliç Koçyîgîte bale ante butçeya serra 2027î ser o û vat: “Barê bacan danê milê şarî û menfeetê sermîyandaran esas gênê. Na butçe sey her serre butçeya sermîyandaran a. Bi na butçe komel hîna zaf feqîr beno. Xercê faîzî reyna zêde yê. Nê xercî eşkenê seba şarî bêrê xebitnayene. Îqtîdar vera feqîrîye têkoşîn nêkeno, feqîrîye îdare keno. Seba menfeetanê weçînayîşan butçe ardimê komelkî rê aqitnenê. Reyna tewr zaf butçe pawitişî rê ameya aqitnayene. Demêk de ke ma qalê Prosesê Aştîye û Komelê Demokratîkî kenê, ma do na butçeya pawitişî senî binirxnê? Serekkomarî vatbî ke butçeya ke şîyêne çek û pawitişî do şarî rê bêra aqitnayene. Ma zî persenê: Şar do key butçe ra îstîfade bikero? Coka eke vatişî de aştî bibo ganî butçe de zî aştî bibo. Eke pêkewtişî biqedîyê ganî xercê ke çekan rê yenê aqitnayene şarî rê bêrê aqitnayene. Ma wazenê ke heme netîceyanê aştîye bivînê.”

 

Gulistan Kiliç Koçyîgîte sewbîna ard ziwan ke ganî derheqê dezgehanê dewlete de zî cipersayîş bêro akerdene ke fonan de berpirsîyar ê û qiseykerdişê xo wina qedîna: “Îqtîdar bi xo zî mîyanê nê fonan de yo. Mexdurîya hemwelatîyan çareser bikerê. La şima bi xo zî mîyanê naye de yê. Şima bi seyan hezaran hemwelatî mexdur kerdî. Şima zî hemkarê nê sûcî yê û ma do hesabpersayîşî dewam bikerê.”