Neslîhan Kardaş

 

ŞIRNEX - Cinîyê ke Zozanê Feraşînî de manenê, adetê koçerîye ya bi serran domnenê, zor û zehmetîyanê ke ciwîyenê wina qal kenê: “Heme bar milê cinîyan ser o. Cinî hewl danê xo biresênê her çîyî.”

 

Zozanê Feraşîn sînorê qezaya Elkeyî ya Şirnexî de ca gêno û yew zozano ke semedê şarê kurdî zaf muhîm o yo. Koçerî bi serran Feraşîn ra nêvisyayê. Cinîyê koçerî serê sibayî wurzenê û tena penîr, mast nêviraznenê, no adet resnenê ameyoxî. Cinî bi keda xo ko, va û demî pîya girêdanê.

 

Cinîyê ke bajarokê Deştadareyî yê Hezexî de manenê û Feraşîn de koçerîye kenê derheqê raywanî, cuye û têkoşînê xo de qisey kerdî.

 

Bi şitê pesî debara xo kenê

 

Besna Kuze va ke cuya koçerîye zehmet a û wina va: “Koçerî ma rê mîras mend. Ma nê adetî domnenê. Zor û zehmetîyê ci est ê la ma hes kenê. Ma ewnîyenê zehmetîyanê ci zaf ê. Ma pes antêne. Ma penîr, şit viraştêne. Ma bi nê berardişanê xo debara xo kenê. La ma zaf erzan gênê. Ma hemverê keda xo nêgînê.”

 

Raywanîya bi aşman dewam kena

 

Besna Kuze va ke aşma adare de şinê zozan û wina va: “Heta peynîya hamnanî ma zozanan de manenê. Dima ra ma agêrênê dewa xo. Ma payatî şinê. Agêrayîş de ma tutanê xo wesayîtan dir şirawenê la ma bi payatî yenê. Raywanî yew aşmî û nîmêk dewam kena. Xebata ma ya cinîyan zehmet a.”

 

‘Ma sereyê sibayî wurzenê’

 

Amber Kuze zî dîyar kerd ke ê serê sibayî wurzenê û va: “Ma heywanî antêne. Ma xebata keyeyî kenê, tutanê xo ra ewnîyenê. Ma şit, mast û penîr virazenê. Ma werdê xo amade kenê. Koçerî zehmet a. Tutê ma nêeşkenê şêrê dibistanan. Heme bêperwerde manenê. Nêweş benê ma nêeşkenê înan berê nêweşxane. Nê semedî ra cuya ma zehmet a. Nêzdîyê 20 serrî yo ez koçer a. Ma serê sibayî 4ine wurzenê. Heme bar milê cinîyan ser o. Cuya zozanan semedê cinîyan zaf zehmet a.”