AGIRÎ - Îlkay Yildirim a ke bi makîneya xo ya deştişî dest bi meslegê xo kerd, mîyanê serran de dikanê xo akerd û hem debara xo kena hem zî bi perwerdeyê ke cinîyan rê dana, piştîdayîşê ekonomî dana cinîyan.

 

Cinî pêwa krîzê ekonomî yê giranêr û mesrefê cuye yê her ke şino zêde beno, dest berardişî ra veranêdanê. Bi hezaran cinîyê ke debara xo bi keda xo kenê, hem têkoşînê ekonomî danê hem zî tecrubeyê xo cinîyanê bînan dir pare kenê û piştîdayîşê pîlî kenê. Îlkay Yildirim a ke 25 serrî yo Agirî de deştiş kena û xebata pîko kena, yew nê cinîyan ra ya. Îlkay Yildirim a ke bi makîneyêk deştişî dest bi xebate kerd, kuçeyê Cumhurîyetî de dikanê deştişî akerd û no hîrê serrî yo binê banê Merkezê Perwerdeyê Şarî de bi kursanê neqş û deştişî perwerdeyê meslegî cinîyan rê dana.

 

Îlkay Yildirim a ke bi serran esnafîye kena, dimayê ke qerarê xo da dikana xo akero, bi atolyeyêka qije dest pêkerd û mîyanê serran de xebata xo pîl kerd. Îlkay Yildirim wina ard ziwan: “Mêrdeyê mi kuçeyê Cumhurîyetî de mexazeya sporî akerdibî. Ma demêk mecbur mendî şêrê Aydin. Dikanêk ma uca de û yew zî tîya de estbî. Ma dikanê uca girewt, ma ancî ameyî Agirî. Mi dikanê mêrdeyê xo akerd û 25 serrî yo akerde yo. Mi pîko kerdêne. Ma Agirî di cinî bîyî ke na xebate kerdêne. Xebata ma zaf baş bî ma zaf qezenc kerdêne.”

 

‘Dimayê ke merdimî biwazê tu çîyêk çin o ke nêeşkê nêkerê’

 

Îlkay Yildirim eşkera kerd ke lazim o ke cinî hîna zêde cuya ekonomî de ca bigîrê û va: “Mi bi xebata xo tutanê xo da wendiş. Ez agêraya deştişî. Mi deştiş kerdêne la mi giranî dabî pîkoyî. A xebate zî her şî peyser kewte. Hîrê serrî yo ez Perwerdeyê Şarî de mamostatîye kena. Lazim o ke cinî keye de nêroşê. Lazim o ke xebata xo bikerê. Linganê xo ser o bivinderê û bixebitîyê. Azadîya ekonomî semedê cinîyan zaf muhîm a. Lazim o ke cinî linganê xo ser o bivinderê.”