MERKEZÊ XEBERAN- Sereka Rêxistina PASS’î û aktîvîsta Yemenî Behîya El Seqaf dîyar kerd ke xebata ke YPJ rayra bena, seba cinîyanê ke waştişê azadî û têduştîye kenê bîya çimeyê hêvî û vat: “Dewaya cinîyan ma ana têhet.”

 

Serekê Rêxistina PASS’î û aktîvîsta Yemenî Behîya El Seqaf seba Yewîneyanê Pawitişê Cinîyan (YPJ) mesajêkê paştîdayîşî weşana. Behîya El Seqaf dîyar kerd ke xebata YPJ’yî, vera şîdet û terorî nimuneyêka muhîm xoverdayîşê cinîyan a.

 

Behîya El Seqaf mesajê xo de bal ant xebata cinîyanê kurdan ser o û vat: “Sêy cinîyêka erebe, ez dîyar kena ke xebata cinîyanê kurdan û Yewîneyanê Pawitişê Cinîyan (YPJ) reyde mîyanê paştîdayîşêka merdimî de ya. Têkoşînê înan ê vera şîdet û terorîzmî, komelanê ma de seba reyna pênasekerdişê rolê cinîyan bi nimûneyêk.”

 

Behîya El Seqaf dîyar kerd ke têkoşînê şerwananê YPJ’yî tena hetê eskerî ra nîyo, eynî wextî de bîyo modelêkê xoverdayîşê femînîstî. Behîya El Seqaf qiseykerdişê xo de vat ke cinîyî eşkenê pawitişê xo, komelê xo û rûmetê xo de rêza verêne de ca bigîrê.

 

Aktîvîsta Yemenî dîyar kerd ke problemê cinîyan sînor, mîletî yan zî nasnameyê dînî nîyê; cinîyî heme dinya de bi dej û tedayanê hempar reyde rîbi rî manenê. Behîya El Seqaf ney ser o vat ke paştîdayîşê cinîyan wayîrê karakterêko mîyanneteweyî yo.

 

Behîya El Seqaf dîyar kerd ke têkoşîn, îrade û fedakarîya cinîyanê kurdan hêvî dana cinîyanê dinya û vat ke azadî û têduştîye tena bi rijîyayîşê qalibanê serdestan û nîjadperestan beno mimkun.

 

Behîya El Seqaf peynîya mesajê xo de vat ke paştîdayîşê cinîyan hêzê tewr pîl o ke eşkeno bedilîyayîş virazo û vat: “Dewayê cinîyan ma anê têhet.