STENBOL - Dayîkanê Şemeyî hewteyê 1098ine de aqubetê Nezîr Acarî yê ke 8ê nîsana 1992ine de amebi vîndîkerdiş persayî.

 

Merdim-Dayîkanê Şemeyî bi waştişê “Vînîbîyayeyî bêrê vînayîş, qetilkarî bêrê muhakemekerdiş” hewteyê 1098ine de Meydanê Galatasarayî de çalakîya xo ya hewtane organîze kerdî. Dayîkanê Şemeyî, endamî û îdarekarê ÎHDyî yê Stenbolî û zafê pawitoxê heqê merdiman tewrê çalakîye bîyî. Çalakîye de fotografê vînîbîyayeyan ame berzkerdiş.

 

Dayîkanê Şemeyî nê hewteyî hîkayeyê Nezîr Acarî ke 34 serrê verî 8ê nîsana 1992ine de amebi vînîkerdiş persayî.

 

Metnê eşkerayîye Hemserekaya Pêroyî ya ÎHDyî Oya Ersoy wend.

 

Agahî Nezîr Acarî ra nêame girewtiş

 

Oya Ersoy ard ziwan ke Tirkîya de polîtîkayê bêcezaverdayîşî yenê averberdiş û wina qisey kerd: “Huqûq dîyar o, ganî rastî bêro eşkerakerdiş. Kerdoxî ganî bêrê muhakemekerdiş û cezakerdiş. Ma hewteyê 1098ine de aqubetê Nezîr Acarî ke dewaya ci bi sebebê ‘demvîyarte’ ameybî betalkerdiş persenê. Nezîr Acar 28 serreyê xo dewa Yalnizî ya qezaya Kerboranî ya Mêrdînî de ciwîyayîne û babîyê 3 tutan bi. Nezîr Acar 8ê nîsana 1992ine de wexto ke semedê heywanan bigîro şibi keyeyê H.Kyê yê qezaya Kerboranî. Leşkerî saete 20.00ine de eştî keyeyê ke Nezîr Acar uca de mendêne ser. Leşkerî Nezîr Acar zî mîyan de çimanê 3 kesan gêrêda û berd Fermandarîya Leşkeran ê qezaya Kerboranî. Uca îşkence înan ser o ame kerdiş, 2 kesî dima ra ameyî veradayîş. La tu agahî Nezîr Acarî ra nêame girewtiş.”

 

Dosyaya Nezîr Acarî bi sebebê demvîyarte ameye girewtiş

 

Peynîya qiseykerdişê xo de Oya Ersoy dîyar kerd ke Babî Halîl Acar semedo ke aqubetê tutê xo bizano muracatê Qeymaqamîya Kerboranî, Walîtîya Mêrdînî û Fermandarîya Alay ê Mêrdînî kerd û va: “La her kes înkar kerd û va ‘Nezîr Acar nêameyo destbendkerdiş.’ Dima ra cigêrayîşê keyeyê Acarî zordarî ser înan zêde bî û Dayîka Celîle Acar ameye destbendkerdiş û îşkence dî. Dayîka Celîle Acar rê îşkenceyî de tehdîdê ‘Senîn ke ma lajê to kişt, ma to zî do bikişê’ ame kerdiş. Serdozgerîya Komare ya Kerboranî cipersayîşêk rind nêdomna. Muracatê keyeyî bênetîce ame verdayîş. 16ê teşrîna peyêne 2012ine de dosyaya Nezîr Acarî bi sebebê demvîyarte ame girewtiş. Ma 34ine serrê ke Nezîr Acar ameyo vînîkerdiş de veng danê ke çekûya demvîyarte semedê huqûqî est a, la semedê rastîye çin a. Çend serrî derbas beno wa bibo ma do aqûbetê kesanê vînîbîyaye bipersê.”

 

Çalakî bi ronayîşê qerenfîlanê Meydanê Galatasarayî peynî bî.​​​​​​​​​​​​​​​​