Melîke Aydin

 

STENBOL - Sereka Pêroyî ya Partîya Şorişgêre Elîf Torûn dîyar kerd ke dinya verê şerêk emperyalîst-kapîtalîstî ya û destnîşan kerd ke hêrişê Rojawanî ser o na mana nêdanê ke pratîkê cuyayîşê pîya yê şaran vînî beno û va: “Têkoşînê yewîye yê şaran tenya çareserî yo.”

 

Sereka Pêroyî ya Partîya Şorişgêre Elîf Torûn averşîyayîşê çar hetê Kurdistanî û Rojhelatê Mîyanênî ercnayîş kerd û dîyar kerd ke îdiayê peyên yê “wayê û biratîya şarî qels bîyo” vera-propagandayî yê û Şorişê Rojawanî ezmûnêk tarîxî yê ke modelê cuyayîşê hembeş mabêne şar û bawerîyan de mojneno. Elîf Torûn destnîşan kerd ke xoverdayîşê bi serkêşîya cinîyan no fikrê têkoşînê hempar gane verdeno û dîyar kerd ke hêrişî îradeyê cuyayîşê hembeş orte ra nêwedarito. Elîf Torûn destnîşan kerd ke lazim o cinîyê ke heme wareyî de têkoşîn kenê cepheyêk hempar ser o bibê yew.

 

‘Ma hemverê şerêk kapîtalîst ê emperyalîstî yê’

 

Elîf Torûn dîyar kerd ke çar hetê Kurdistanî û Rojhelatê Mîyanên prosesêk ra derbas beno ke hem hêzê emperyalîst û hem zî aktorê kolonyalîst ê herêmî goreyê berjewendîyê xo planê neweyî viraznenê. Elîf Torûn wina va: “No qîm nêkerd; înan bi ardişê şarî yê hemverê yewbînan goreyê polîtîkayê xo têkilîyê neweyî awankerdî û kewtî prosesêk parçekerdişî. Ewro ma verê şerêk kapîtalîst ê emperyalîstî yê. Hêzê kolonyalîstî polîtîkayê ke şar hemverê yewbînan anê, şer tehrîk kenê û înan orte ra wedarnenê, heme semedê eynî armancî pê anê. Na polîtîka demêk derg o rojeve de ya.”

 

‘Têkoşîn tenya semedê şarê kurdî nîyo’

 

Elîf Torûn qetî kerd ke têgêrayîşê azadîya kurdî tenya semedê şarê xo nê, labelê eynî wextî de “semedê azadîya şarê Rojhelatê Mîyanên” zî têkoşîn keno û wina dewam kerd: “Ganî no nêro peygoşkerdiş.” Elîf Torûn destnîşan kerd ke têgêrayîş hewl dano çareserîyêk îdeolojîk aver bero û va: “Ganî têkoşîn tenya bi nameyê şarê kurdî nê, labelê eynî wextî de bi xetê têkoşînêk hempar ke şarê cîranî zî verê çiman de gêno bêro domnayene.”

 

‘Hêrişê Rojawanî ser ruhê pêgirewtişê çar perçeyê Kurdistanî xurt kerdo’

 

Elîf Torûn wina dîyar kerd: “Ercnayîşê nê yewî sey qelsbîyayîşê wayê û biratîya şaran nêheqîyêk hemverê neteweyêkî yo ke yeno peygoşkerdiş. Planê neweyî yê emperyalîstî hemverê awanîyê îslamîstî yê çar perçeyê Kurdistanî de yenê domnayene. Prosesêk şerî dewamker de berzbîyayîş û vistişî mecbûr o, labelê no yew armancê stratejîkî nêvurneno. Semedê cimatê ke bi seserran pîya ciwîyayê mimkûn nîyo ke êdî nêeşkê yewbînan dir biciwîyê; çîyo ke lazim o analîzêk rast ê prosesî û dewamkerdişê têkoşînî yê bi qerardarî yo.”

 

‘Cinî fek nê ra vera nêdanê, têkoşînê yewgirewte pîl beno’

 

Elîf Torûn dîyar kerd ke cinî tenya Rojawan de nê, labelê xeylêk cayanê dinya de çalak ê û wina va: “Ma nê Şorişê Rojawanî de dî; cinî vernê de bîyî. Wexto ma têkoşînê cimatî yê cayanê cîya ewnîyenê, ma fotografêk şibîyenê yewbînan vînenê. Tu hêzêk nêeşka cinîyan vindarno. Cinîyê sinifa karkeran a Tirkîya de, cinîyê sendîkayan de; cinîyê ke heme ca û heme wareyî de têkoşîn kenê, ganî cepheyêk hempar de bêrê têhet. Ezmûnê wareyî nê yewî piştrast kenê. Cinî fek veranêdanê, têkoşînê yewgirewte pîl beno.”