STENBOL - Dayikê Şemeyî çalakîya xo ya 1091ine de aqûbetê Murat Yildizî pers kerdî.

 

Merdimê yanê Dayikê Şemeyî bi waştişê vînîbîyayeyî bêrê dîyayene û kiştoxî bêrê muhakemekerdiş, hewteyê 1091ine de Meydanê Galatasarayî de çalakîya xo ya hewtane organîze kerdî. Dayikê Şemeyî, endam û îdarekarê ÎHDyê Stenbolî û xeylêk kesî beşdarê çalakîye bîyî. Çalakî de fotografê vînîbîyayeyan ame wedaritiş. Dayîkê Şemeyê no hewte aqûbetê Murat Yildiz ke serra 23ê sibata 1995ine de ame vînîkerdiş pers kerdî. Metnê eşkerayîye Merdima Şemeyî ra Masîde Ocak wend.

 

Masîde Ocak dîyar kerd ke hewteyê 1091ine de Murat Yildiz ke verê 31 serran destbendkerdiş de ame vînîkerdiş persenê û va: “Murat Yildizo 19 serre Îzmîr de ciwîyayîne. Murat Yildiz tewrê hedîseyêke bibi, polîsan dayîka Murat Yildiz ra va ‘wa Murat bêro îfade, dimayê îfadeyî ma do ey veradê’. Dimayê nê Murat Yildiz 23ê Sibata 1995ine de avûkatê xo dir şi qerekol û îfade da komîser Ramazan Kaya û polîs Tahîr Şerbetçî. Dimayê 3 rojan Murat Yildiz anêgêra keyeyê xo. Dayika ci Hanîfe Yildiz şî qerekol û polîsan va ‘wexto ke Murat polîs Ramazan Kaya û Tahîr Şerbetçî dir şîne Stenbol xo ferîbote ra eşt behr û rema’. Çend serrî zî derbas bibo ma do aqûbetê vînîbîyayeyan pers bikerê”

 

Dimayê eşkerayîye Merdimê Şemeyî qerenfîlan dayî Meydanê Galatasarayî û çalakî peynî kerdî.