ÎZMÎR - Hemsereka Komeleya Cigêrayîş û Kultur û Ziwan ê Avesta Kurdiye Îrgat dîyar kerd ke çinhesibnayîşê ziwanî tenya vînîbîyayîşê ziwanî nîyo, hêrişêk hemverê nasnameyê şarî yo. Kurdiye Îrgat va zaf ziwanî dewlemendî ya.

 

Hemsereka Komeleya Cigêrayîş û Kultur û Ziwan ê Avesta Kurdiye Îrgat derheqê muhîmîya 21ê Sibate Roja Ziwanê Dayîke de ercnayîş kerd. Kurdiye Îrgat da zanayîş ke ewro şar tenya bi ziwanê xo eşkeno xo îfade bikero û wina va: “Tutî pîzeyê dayîka xo de bi vengê dayîka xo dinya, fikr û fehmê xo formule kenê. Nê semedî ra zî qedexekerdişê ziwanî yeno manaya çinkerdişê neslî. Wexto ke dayîkî ziwanê xo nêpawê, neslê ke pîl benê zî çinbîyayîşî dir rî bi rî yenê.”

 

‘Hemverê çinbîyayîşê ziwanî vindertişêk yeno mojnayîş’

 

Kurdiye Îrgat dîyar kerd ke ziwan bîyayîşêk gane yo û her gane demî dir mireno. Kurdiye Îrgat nê çî dîyar kerd: “Çinbîyayîşê ziwanêk tenya vînîbîyayîşê vatişan nîyo, eynî wextî de çinbîyayîşê kulturî yo. Çinbîyayîşê ziwanî hemverê dewlemendîya kultur û ziwanê cîranî zî vindertişêk hemverî yo. Semedo ke ziwan wexto ke pîya têkildar bê dewlemend benê. Xeylêk welatan de zaf ziwanî est o. Nimûne Bolîvya ke 12 mîlyon nifûsê ci est o 37 ziwanê fermî est ê. Hîndîstan ke mîlyarêk û nîm nifûsê ci est o 22 ziwanê fermî est ê. Kurdkî ziwanêk xurt û dewlemend a. Labelê çi heyf bi serran ameya înkarkerdiş. Nê semedî ra kurdî hemverê nê de xover danê û qebûl nêkenê.”

 

Vengdayîşê 21ê Sibate

 

Kurdiye Îrgat dîyar kerd ke Tirkîya û Kurdistan de prosesêk newe dest pêkerdo û wina dewam kerd: “Hêvî û waştişê ma oyo ke kurdkî rê statu bêro naskerdiş û bibo ziwanê fermî. Ez venga heme kesê ke hemverê nê tehlukeyê kurdkî ser o xemgîn benê, kena ke 21ê Sibate de semedê kurdkî têkoşîn bikerê.”